अमेरिकाको जर्जिया राज्यमा एउटा विमान व्यस्त सडकमा दुर्घटनाग्रस्त भएको छ।
आपतकालीन अवतरण गर्ने क्रममा उक्त विमान सडकमा दुर्घटना भएको हो।
सोमबार जर्जियाको गेनसभिल सहरको व्यस्त सडकमा अवतरण गर्दा विमानले सडकमा गुडिरहेका सवारी साधनमा ठक्कर दिएको स्थानीय समाचार संस्थाहरूले जनाएका छन्।
प्रहरीका अनुसार एक इन्जिनयुक्त सानो प्रशिक्षण विमानमा प्राविधिक समस्या आएपछि पाइलटले सडकमा आपतकालीन अवतरण गराएका थिए।
विमानमा पर्याप्त शक्ति नहुँदा विमानस्थलसम्म फर्किन नसकेपछि पाइलटले सडकमै आकस्मिक अवतरण गरेको बताएका छन्।
घटनाको भिडिओ सामाजिक सञ्जालमा व्यापक रूपले फैलिएको छ। भिडिओमा विमान व्यस्त सडकमा अवतरण गरेपछि क्रमशः सवारी साधनहरूमा ठोक्किँदै गएको देखिन्छ।
दुर्घटनामा केही व्यक्ति सामान्य घाइते भएको प्रहरीले जनाएको छ।
प्रहरीका अनुसार अवतरणपछि विमानको दायाँ पखेटाले एउटा सवारी साधनलाई छोएको थियो। त्यस क्रममा विमानको इन्धन ट्यांकी छुट्टिएर एउटा एसयुभीको पछाडिको भाग हुँदै अर्को सवारी साधनसम्म पुगेको थियो।
विमान दुर्घटनापछि उक्त सडक बन्द गरिएको छ।
स्थानीय प्रशासनले लामो समयसम्म ट्राफिक जाम हुन सक्ने भन्दै सर्वसाधारणलाई वैकल्पिक मार्ग प्रयोग गर्न आग्रह गरेको छ।
नेसनल ट्रान्सपोर्टेसन सेफ्टी बोर्ड (एनटिएसबी) का अनुसार विमान गेनसभिलस्थित ली गिल्मर मेमोरियल विमानस्थलबाट क्यान्टनको चेरोकी काउन्टी क्षेत्रीय विमानस्थलतर्फ जाँदै गर्दा उडानको केही समयमै इन्जिनमा समस्या आएको थियो।
एनटिएसबीका अनुसार पाइलटले गेनसभिलमै फर्केर अवतरण गर्ने प्रयास गरेका थिए। तर विमानमा पर्याप्त शक्ति नहुँदा सडकमा जबर्जस्ती अवतरण गर्नुपरेको र त्यस क्रममा विमान तीन वटा सवारीसाधनमा ठोक्किएको हो।
संघीय नागरिक उड्डयन प्रशासन (एफएए) का अनुसार हकर बिचक्राफ्ट बीई–३६ विमानले स्थानीय समय अनुसार सोमबार दिउँसो १२:१० बजे आपतकालीन अवतरण गरेको थियो। एफएएले घटनाबारे छानबिन सुरू गर्ने जनाएको छ।
