काठमाडौँ — नेकपा (एमाले) का सचिव महेश बस्नेतले पार्टीले सुरु गरेको सडक आन्दोलन कमजोर नभएको दाबी गर्दै यसले बिस्तारै विशाल रूप लिने बताएका छन्। पार्टी अध्यक्ष केपी शर्मा ओलीको पक्राउ विरुद्ध एमालेले देशव्यापी विरोध गरिरहेका बेला सचिव बस्नेतले यस्तो धारणा राखेका हुन्।
पार्टी कार्यालय च्यासलमा सञ्चारकर्मीहरूसँग कुरा गर्दै बस्नेतले एमालेको वर्तमान आन्दोलनलाई शिवरात्रिमा बालिने आगोसँग तुलना गरे। उनले भने “शिवरात्रिमा आगो बाल्दा सुरुमा झिँजा बल्छ, त्यसपछि मात्र मुढा बल्न सुरु गर्छ। हाम्रो आन्दोलन पनि अहिले प्रारम्भिक चरणमै छ। यो झिँजा बल्दै गरेको अवस्था हो, मुढा बल्न त बाँकी नै छ।”
उनले एमाले जस्तो ठूलो पार्टीको आन्दोलनलाई सामान्य रूपमा नलिन र यो बिस्तारै देशव्यापी जनसागरमा परिणत हुने दाबी गरे।
सचिव बस्नेतले वर्तमान सरकारले प्रतिपक्षी दल र त्यसका नेताहरू प्रति ‘आग्रहपूर्ण’ र ‘पूर्वाग्रही’ सोच राखेर कदम चालिरहेको आरोप लगाए। उनले सरकारको यस्तो व्यवहारले लोकतन्त्रलाई कमजोर बनाउने र त्यसको परिणाम सरकारकै लागि प्रत्युत्पादक हुने चेतावनी दिए।
“यदि सरकारले एमालेलाई सिध्याउने वा दमन गर्ने नियत राख्छ भने त्यसको परिणाम निकै महँगो पर्नेछ,” उनले थपे।
‘जेनजी’ (Gen Z) आन्दोलनका क्रममा भएको दमनको आरोपमा अध्यक्ष ओली पक्राउ परेपछि एमालेले यसलाई ‘राजनीतिक प्रतिशोध’ भन्दै आएको छ। सचिव बस्नेतले उक्त घटनाको निष्पक्ष छानबिन हुनुपर्ने तर राजनीतिक नेताहरूलाई खुइल्याउने हिसाबले गरिएका गतिविधि स्वीकार्य नहुने स्पष्ट पारे।
अहिले एमालेको सचिवालय बैठकले आन्दोलनका थप कडा कार्यक्रमहरू तय गर्ने तयारी गरिरहेको छ ।
