रोम — विश्व फुटबलको महाशक्ति इटालीले पुनः एकपटक अविश्वसनीय पीडा र लज्जाको सामना गर्नुपरेको छ। चार पटकको विश्वकप विजेता इटाली लगातार तेस्रो पटक विश्वकपमा छनोट हुन असफल भएको छ। मंगलबार राति भएको युरोपेली प्लेअफ छनोटमा ६६ औं वरीयताको बोस्निया एन्ड हर्जगोभिनासँग पेनाल्टी शुटआउटमा पराजित भएसँगै इटालीको विश्वकप यात्रामा पूर्णविराम लागेको हो।
निर्धारित ९० मिनेट र अतिरिक्त समयको खेल १–१ को बराबरीमा टुंगिएपछि खेलको निर्णय पेनाल्टी शुटआउटबाट लिइएको थियो। खेलमा , अजुरी (इटाली) का लागि मोइस केन ले गोल गर्दै टोलीलाई अग्रता दिलाएका थिए। खेलको सुरुवातमै सेन्टर ब्याक एलेसान्द्रो बास्टोनी ले रातो कार्ड खाएपछि इटाली १० खेलाडीमा सीमित भयो। ७९ औं मिनेटमा वैकल्पिक खेलाडी हारिस ताबाकोभिच ले गोल गर्दै खेल बराबरीमा ल्याए।
पेनाल्टी शुटआउटमा इटालीका पिओ इस्पोसिटो र ब्रायन क्रिस्टान्टे गोल गर्न चुके। बोस्नियाका लागि अमेरिकामा जन्मेका इस्मिर बाज्राकटेरेभिच ले निर्णायक गोल गर्दै आफ्नो टोलीलाई सन् २०१४ पछि पहिलो पटक विश्वकपमा पुर्याए।
इटालीका डिफेन्डर लियोनार्दो स्पिनजालो ले भावुक हुँदै हारको पीडा व्यक्त गरे। उनले भने, “हामी अझै पनि विश्वास गर्न सकिरहेका छैनौं। हाम्रा केही सन्ततिले त इटालीले विश्वकप खेलेको सम्म देख्न पाएका छैनन्। यो हाम्रो मात्र होइन, पूरै देशको पीडा हो।”
इटालीका प्रशिक्षक गेनारो गाटुसो ले हारको जिम्मेवारी लिँदै प्रशंसकहरूसँग माफी मागेका छन्। उनले यसलाई इटालीको राष्ट्रिय टिम र क्लब फुटबलकै लागि कठिन परिस्थिति बताएका छन्।
इटालीको फुटबल इतिहासमा यो सबैभन्दा खराब कालखण्ड सावित भएको छ: अब इटाली जत्तिको टोलीले कम्तीमा १६ वर्ष विश्वकप नखेली बिताउनुपर्ने भएको छ। यसअघिका दुई प्लेअफमा इटाली स्विडेन र उत्तरी म्यासेडोनियासँग हारेर बाहिरिएको थियो। इटालीले अन्तिम पटक सन् २००६ मा विश्वकप जितेको थियो र त्यसयता नकआउट चरण समेत पुग्न सकेको छैन। “मलाई लाग्छ, हामी अहिले साँच्चै ठूलो समस्यामा छौं।” — ग्याब्रियल ग्राभिना, अध्यक्ष, इटाली फुटबल संघ
मंगलबार भएका अन्य प्लेअफ खेलहरूबाट स्विडेन, टर्की र चेक गणतन्त्र भने विश्वकपका लागि छनोट हुन सफल भएका छन्।
यस हारले प्रशिक्षक गाटुसोको भविष्यमाथि पनि प्रश्नचिन्ह खडा गरिदिएको छ। सन् १९५८ पछि पहिलो पटक विश्वकपमा छनोट हुन नसकेको खराब रेकर्ड बनाएको इटाली अहिले एक पुस्ता नै विश्वकपको अनुभवबिहीन हुने अवस्थामा पुगेको छ।
