काठमाडौं, २८ चैत । पूर्वप्रधानमन्त्री डा. बाबुराम भट्टराई भोलि आइतबार (चैत २९ गते) भारत भ्रमणमा जाने हुनुभएको छ। भारतको ग्वालियरस्थित आईटीएम (ITM) विश्वविद्यालयमा आयोजना हुने विशेष प्रवचन कार्यक्रममा सहभागी हुन उहाँ त्यसतर्फ जान लाग्नुभएको हो।
डा. भट्टराई आगामी वैशाख १ गते आयोजना हुने ‘डा. राममनोहर लोहिया स्मृति व्याख्यान’ कार्यक्रममा प्रमुख वक्ताका रूपमा सहभागी हुनुहुनेछ। डा. भीमराव अम्बेडकरको जन्मजयन्तीको अवसर पारेर विगत ११ वर्षदेखि यो कार्यक्रम निरन्तर आयोजना हुँदै आएको छ। भ्रमण टोलीमा पूर्वमन्त्री हिसिला यमि पनि सहभागी हुनुहुनेछ।
ग्वालियरको कार्यक्रम पश्चात् डा. भट्टराई नयाँ दिल्ली पुग्नुहुने कार्यतालिका छ। उहाँले वैशाख २ गते नयाँ दिल्लीस्थित साउथ एसियन युनिभर्सिटी (SAU) द्वारा आयोजित विशेष कार्यक्रममा पनि प्रमुख वक्ताका रूपमा आफ्नो धारणा राख्नुहुने उहाँको सचिवालयले जनाएको छ।
दुईवटा प्राज्ञिक कार्यक्रमहरूमा सम्बोधन गरिसकेपछि डा. भट्टराई वैशाख २ गते साँझ नै नेपाल फर्कनुहुनेछ। राजनीतिक भेटघाट भन्दा पनि प्राज्ञिक र बौद्धिक छलफलमा केन्द्रित रहने यो भ्रमणलाई महत्वका साथ हेरिएको छ।
