राष्ट्रिय स्वतन्त्र पार्टी (रास्वपा)ले आज ३७ जिल्लामा अधिवेशन गर्दैछ । पार्टीको केन्द्रीय समितिको निर्णय अनुसार आज कोशी प्रदेशका ९, मधेसका २, बागमतीका ९, गण्डकीका ५, लुम्बिनीका ८, कर्णालीका २ र सुदूरपश्चिम प्रदेशका ३ जिल्लामा अधिवेशन भइरहेको महामन्त्री कविन्द्र बुर्लाकोटीले जानकारी दिनुभयो ।
भोलि २९ वटा जिल्लामा अधिवेशन हुनेछ । बारा जिल्ला अधिवेशन भने यही जेठ २६ गते मङ्गलवार हुनेछ । प्रथम राष्ट्रिय महाधिवेशन अगावै ७७ मध्ये ६७ जिल्लामा अधिवेशन सम्पन्न गर्ने रास्वपाको तयारी छ । बाँकी १० जिल्लाको अधिवेशन राष्ट्रिय महाधिवेशनपछि हुनेछ ।
यही जेठ २६ गतेदेखि सात प्रदेशको अधिवेशनको तयारी भइरहेको उहाँले जानकारी दिनुभयो । पहिलो अधिवेशन बागमती प्रदेशबाट शुरू हुनेछ । रास्वपाको प्रथम राष्ट्रिय महाधिवेशन आउँदो असार ७ देखि ९ गतेसम्म चितवनमा हुँदैछ ।
