काठमाडौं, २१ चैत । संयुक्त अरब इमिरेट्स (यूएई) को अबुधाबीमा ड्रोनका अवशेष खस्दा घाइते भएका सात नेपालीमध्ये ६ जना अस्पतालबाट डिस्चार्ज भएका छन् । अबुधाबीस्थित नेपाली दूतावासका अनुसार उपचाररत सातै जनासँग सम्पर्क भइरहेको र डिस्चार्ज हुन बाँकी एक नेपालीको अवस्था पनि खतरामुक्त रहेको छ ।
गत शुक्रबार इरानद्वारा प्रहार गरिएको ड्रोनलाई यूएईको वायु रक्षा प्रणालीले आकाशमै नष्ट गरेपछि त्यसको भग्नावशेष अबुधाबीको अजबान क्षेत्रमा खसेको थियो । उक्त दुर्घटनामा परी ७ नेपाली र ५ भारतीय गरी कुल १२ जना घाइते भएका थिए ।
यूएईको सरकारी सञ्चारमाध्यमले नेपालीहरू घाइते भएको खबर सार्वजनिक गरेलगत्तै दूतावासले सक्रियता देखाएको थियो । दूतावासका कर्मचारीहरूले घाइतेहरूसँग प्रत्यक्ष सम्पर्क गरी उनीहरूको स्वास्थ्य अवस्था र उपचारका बारेमा निरन्तर जानकारी लिइरहेको जनाएका छन् ।
हाल डिस्चार्ज भएका ६ जना आ-आफ्नो बसोबासमा फर्किसकेका छन् भने बाँकी एक जनाको अस्पतालमा सामान्य उपचार भइरहेको छ ।
