सिरहा । नेकपा एमाले सिरहाका प्रदेश तथा जिल्लास्तरका दर्जनौँ नेताले बुधबार पार्टी परित्याग गर्ने घोषणा गरेका छन्। उनीहरूले पार्टी नेतृत्वको कार्यशैलीप्रति असन्तुष्टि जनाउँदै पार्टी छाडेको बताएका छन्।
पार्टी परित्याग गर्ने नेताहरूमा प्रदेश कमिटी सदस्य पुष्पलाल पाख्रिन, पूर्व जिल्ला कमिटी सदस्य धाबबहादुर बुढाथोकी, शिक्षक संगठनका प्रदेश सदस्य भीमबहादुर थापा, तुलसीप्रसाद उपाध्याय, तेजकुमार लामा, जिल्ला कमिटी सदस्य प्रमोदकुमार लामा, गोलबजार नगर कमिटीका पूर्व वडा अध्यक्ष राजकरण साहलगायत अन्य नेताहरू रहेका छन्।
पार्टी छाड्ने नेताहरूले लामो समयदेखि पार्टीभित्र नेतृत्वको एकल निर्णय प्रक्रिया, स्वेच्छाचारी व्यवहार तथा कार्यकर्ताका भावना र सुझावको बेवास्ता हुँदै आएको आरोप लगाएका छन्। यस्ता प्रवृत्तिले आफूहरू निराश बनेको र बाध्य भएर पार्टी परित्याग गर्नुपरेको उनीहरूको भनाइ छ।
यस विषयमा एमाले मधेश प्रदेश विद्यार्थी संगठनका संयोजक सतिश सिंहले प्रतिक्रिया दिँदै पार्टी छाड्ने नेताहरू अवसरवादी भएको टिप्पणी गरेका छन्। उनले भने, “पार्टीभित्र बसेर संगठनलाई कमजोर बनाउनेहरू बाहिरिनु नै राम्रो हो। व्यक्तिगत पदका लागि कोही बाहिरिए पनि पार्टीलाई कुनै फरक पर्दैन। पार्टी अझ मजबुत भएर अघि बढ्छ।”
पार्टी नेतृत्वले यस घटनालाई गम्भीर राजनीतिक संकटका रूपमा नलिँदै नेताहरूको व्यक्तिगत निर्णयका रूपमा मात्र लिएको जनाएको छ।
