सिरहा ।नेपाल कम्युनिस्ट पार्टी (एमाले) गोलबजार नगर कमिटीद्वारा आयोजित नगर कमिटी बैठक तथा पार्टी प्रवेश कार्यक्रम सम्पन्न भएको छ। कार्यक्रममा नेकपा माओवादी केन्द्र, हालको नेकपा, जसपा, जनमत पार्टी लगायत विभिन्न दल परित्याग गरी १२५ जना नेता–कार्यकर्ता एमालेमा प्रवेश गरेका छन्।
कार्यक्रमलाई सम्बोधन गर्दै मधेश प्रदेश सभा सदस्य तथा एमालेका नेता मनोज कुमार सिंहले देशलाई समृद्धिको बाटोमा लैजान एमालेको स्पष्ट नीति र बलियो नेतृत्व अपरिहार्य रहेको बताए। उनले मधेश प्रदेशमा विकास, सुशासन र रोजगारी सिर्जनामा एमाले प्रतिबद्ध रहेको उल्लेख गरे।
एमाले केन्द्रीय सदस्य रामपृत रामले एमाले सधैं देश, लोकतन्त्र र राष्ट्रिय एकताको पक्षमा उभिएको पार्टी भएको बताए। उनले जनताको विश्वास नै पार्टीको मुख्य शक्ति भएको धारणा व्यक्त गरे।
त्यसैगरी एमाले मधेश प्रदेश अध्यक्ष चन्देश्वर मण्डलले मधेशका जनताको हकअधिकार, पहिचान र समग्र विकासका सवालमा एमाले अग्रपंक्तिमा रहेको बताए। उनले विभिन्न पार्टीका नेता–कार्यकर्ता एमाले प्रवेश गर्नु जनविश्वासको प्रमाण भएको दाबी गरे।
कार्यक्रमका प्रमुख अतिथि तथा सिरहा क्षेत्र नं. ३ का उम्मेदवार लिलानाथ श्रेष्ठले एमालेले देशलाई राजनीतिक स्थायित्व र विकासको दिशामा अघि बढाएको बताए। उनले गोलबजार र सिरहाको समग्र विकासका लागि एमालेको विकल्प नरहेको स्पष्ट पारे। साथै नेपाल कम्युनिस्ट पार्टी(एमाले) सिरहा क्षेत्र -३ को सम्पर्क कार्यालय समेत उद्घाटन गरेका छ्न ।
कार्यक्रमको आयोजना एमाले गोलबजार नगर कमिटीले गरेको हो। कार्यक्रममा सहभागीहरूले एमाले नै देश विकासको भरोसायोग्य शक्ति भएको निष्कर्ष निकाल्दै पार्टीलाई अझ सशक्त बनाउने प्रतिबद्धता जनाएका थिए।
