सिरहा । सिरहाको अर्नमा गाउँपालिका वडा नं. २ ब्रहमपुरीमा वडा स्तरीय निर्वाचन बैठक तथा पार्टी प्रवेश कार्यक्रम भव्य रूपमा सम्पन्न भएको छ। कार्यक्रममा विभिन्न दल परित्याग गरी सयौंको संख्यामा नेता–कार्यकर्ता नेपाल कम्युनिष्ट पार्टी (एमाले) मा प्रवेश गरेका छन्।
नेपाल कम्युनिष्ट पार्टी (माओवादी केन्द्र) की प्रदेश सदस्य प्रयाग देवी खत्बे लगायत जनता समाजवादी पार्टी र नेपाली कांग्रेस परित्याग गरी एमालेमा प्रवेश गरेका हुन्।
कार्यक्रममा एमाले केन्द्रीय सदस्य तथा क्षेत्र नं. ३ का उम्मेदवार लिलानाथ श्रेष्ठले नवप्रवेशीहरूलाई खादा लगाएर स्वागत गरेका थिए। श्रेष्ठले भने, एमाले जनताको भरोसाको केन्द्र हो। देशको स्थायित्व, विकास र समृद्धिका लागि एमालेको विकल्प छैन। आज सयौं साथीहरू एमालेमा प्रवेश गर्नुले हाम्रो संगठन अझ सशक्त बनेको छ।
श्रेष्ठले आगामी निर्वाचनमा व्यापक जनसमर्थनसहित विजय हासिल गर्ने विश्वास व्यक्त गर्दै संगठनलाई गाउँ–गाउँमा मजबुत बनाउन सबैलाई आह्वान गरे। नवप्रवेशी नेता प्रयाग देवी खत्बेले आफ्नो भनाइ राख्दै भनिन्, देशको समृद्धि र स्थिर सरकारका लागि एमाले नै सक्षम शक्ति भएको महसुस गरी हामी एमालेमा आबद्ध भएका हौं। अब जनताको सेवामा एकजुट भएर काम गर्नेछौं।
कार्यक्रममा स्थानीय नेता–कार्यकर्ता, समर्थक तथा सर्वसाधारणको उल्लेख्य उपस्थिति रहेको थियो। सहभागीहरूले आगामी निर्वाचनमा एमाले उम्मेदवारलाई विजयी गराउने प्रतिबद्धता व्यक्त गरेका थिए।
