चार महिनापछि पहिलो पटक रुस र युक्रेनबीच ठूलो संख्यामा युद्धबन्दी र नागरिकको साटासाट भएको छ। संयुक्त अरब इमिरेट्सको राजधानी अबुधाबीमा दुई दिनसम्म अमेरिकी मध्यस्थतामा चलेको वार्तापछि दुवै पक्षले १५७–१५७ जनालाई स्वदेश फिर्ता पठाएका छन्।
युक्रेनी राष्ट्रपति भोलोदिमिर जेलेन्स्कीका अनुसार फर्किएका युक्रेनीमध्ये ७ जना सर्वसाधारण हुन् भने बाँकी सशस्त्र बल, नेशनल गार्ड र सीमा सुरक्षा बलका सैनिक हुन्। उनीहरूमध्ये अधिकांश २०२२ देखि रुसी कब्जामा थिए। जेलेन्स्कीले रुसी जेलमा रहेका प्रत्येक युक्रेनीलाई घर फर्काउने आफ्नो प्रतिबद्धता दोहोर्याएका छन्।
रुसले पनि आफ्ना १५७ सैनिक र युक्रेनी कब्जामा रहेका तीन रुसी नागरिकलाई मुक्त गरेको पुष्टि गरेको छ। अमेरिकी राष्ट्रपति डोनाल्ड ट्रम्पको पहलमा सुरु भएको वार्तामा विशेष दूत स्टिभ विट्कोफ र ट्रम्पका ज्वाइँ जारेड कुश्नरले नेतृत्व गरेका थिए।
वार्ताका क्रममा मुख्य रूपमा क्षेत्रीय अखण्डता र भविष्यमा हुने सम्भावित रुसी आक्रमण रोकथामका लागि युक्रेनले माग गरेको सुरक्षा ग्यारेन्टी विषयमा छलफल केन्द्रित भएको थियो। रुसले युक्रेनको पूर्वी औद्योगिक क्षेत्र डोनबासको बाँकी भूभाग सुम्पिनुपर्ने माग गर्दै आएको छ, जुन युक्रेनका लागि सबैभन्दा संवेदनशील मुद्दा बनेको छ।
विशेष दूत विट्कोफले वार्ता ‘विस्तृत र फलदायी’ भएको बताए पनि अझै धेरै काम बाँकी रहेको उल्लेख गरेका छन्। जेलेन्स्कीले पनि वार्ता सहज नभएको र ‘छिटो नतिजा चाहेको’ धारणा व्यक्त गरेका छन्।
यद्यपि, रुसले युक्रेनको ऊर्जा क्षेत्रमा आक्रमण जारी राख्दा लाखौँ मानिस चिसो, पानी र बिजुलीबिहीन अवस्थामा रहेका बेला यो कैदीबन्दी साटासाट युद्ध अन्त्यको दिशामा सानो तर सकारात्मक संकेत बनेको छ।
