काठमाडौँ, – नेकपा (एमाले)ले संविधान दिवसलाई राष्ट्रिय महत्त्वका साथ मनाउन मातहतका सबै कमिटीलाई निर्देशन दिएको छ ।
एमालेका महासचिव शङ्कर पोखरेलले आज प्रदेश, जिल्ला तथा पालिका कमिटीलाई पत्राचार गर्दै यही असोज ३ गते पर्ने संविधान दिवसका अवसरमा विगतका वर्षमा झैँ यस वर्ष पनि विभिन्न रचनात्मक कार्यक्रम आयोजना गर्न निर्देशन दिनुभएको हो ।
पार्टीका अनुसार संविधानको रक्षा, संरक्षण र कार्यान्वयनप्रति जनस्तरमा सकारात्मक सन्देश प्रवाह गर्ने उद्देश्यले स्थानीय आवश्यकता र परिस्थितिअनुसार कार्यक्रम सञ्चालन गर्न भनिएको छ । त्यसका लागि आ–आफ्नो क्षेत्र तथा कमिटीको स्तरमा प्रभातफेरी, दीपप्रज्ज्वलन, विचार गोष्ठी, सरसफाइ अभियानलगायतका कार्यक्रम आयोजना गर्न महासचिव पोखरेलले आग्रह गर्नुभएको छ ।
एमालेले संविधान दिवस केवल औपचारिक रूपमा मनाउनेभन्दा पनि संविधानका मूल भावना, लोकतान्त्रिक मूल्य–मान्यता तथा संवैधानिक व्यवस्थाबारे नागरिकमा जानकारी र जागरण अभिवृद्धि हुने गरी कार्यक्रम सञ्चालन गर्न मातहतका कमिटीलाई आह्वान गरेको जनाएको छ ।
पार्टीले संविधानको संरक्षण तथा प्रभावकारी कार्यान्वयनलाई आफ्नो प्रतिबद्धताको विषयका रूपमा अघि सार्दै संविधान दिवसका अवसरमा पार्टीका सबै तहलाई सक्रिय सहभागिता जनाउन निर्देशन दिएको हो ।
संविधान दिवस नेपालमा प्रत्येक वर्ष असोज ३ गते मनाइन्छ । यस दिन २०७२ साल असोज ३ गते नेपालको संविधान जारी भएको थियो।
