आगामी फागुन २१ गते हुने प्रतिनिधिसभा सदस्य निर्वाचनअन्तर्गत देशभरका १६५ वटै निर्वाचन क्षेत्रमा मनोनयनपत्र दर्ता गराएका ३ हजार ४८६ उम्मेदवारमध्ये पाँच जनाविरुद्ध मात्र उजुरी दर्ता भएको छ ।
निर्वाचन आयोगका सहायक प्रवक्ता कुलबहादुर जिसीका अनुसार मंगलबार बिहान १० बजेदेखि दिउँसो ३ बजेसम्म उम्मेदवारको योग्यता नपुगेको भन्दै उजुरी दर्ता गर्ने समय तोकिएको थियो । सो अवधिमा प्रारम्भिक विवरणअनुसार जम्मा पाँच उजुरी दर्ता भएका छन् ।
निर्वाचन आयोगले प्रतिनिधिसभा निर्वाचन निर्देशिका, २०८२ अनुसार सम्बन्धित निर्वाचन अधिकृतको कार्यालयमार्फत उजुरी दर्ता प्रक्रिया अघि बढाइएको जनाएको छ । निर्देशिकाको अनुसूची १६ बमोजिम उजुरी दर्ता गरी अनुसूची १७ अनुसार दर्ता किताबमा अभिलेख राखिएको र अनुसूची १८ बमोजिमको भरपाइ उजुरीकर्तालाई प्रदान गरिएको आयोगले जनाएको छ ।
निर्वाचन कार्यक्रमअनुसार उजुरी दर्ताको म्याद समाप्त भएपछि निर्वाचन अधिकृतहरूले म्यादभित्र प्राप्त उजुरीहरूको विवरण अनुसूची १९ बमोजिम तयार गरी सम्बन्धित कार्यालयमा सार्वजनिक गरेका छन् । प्रकाशित सूचनाअनुसार जसको विरुद्ध उजुरी परेको छ, सो उम्मेदवारले तोकिएको अवधिभित्र प्रमाणसहित उपस्थित हुनुपर्ने व्यवस्था गरिएको छ । सूचना प्रकाशन भएपछि सम्बन्धित उम्मेदवारले त्यसको जानकारी पाएको मानिने कानुनी व्यवस्था छ ।
निर्वाचन आयोगका अनुसार मंगलबार दिउँसो ३ बजेदेखि माघ ८ गते बेलुका ५ बजेसम्म मनोनयनपत्र र उजुरीमाथि जाँचबुझ तथा निर्णय प्रक्रिया सञ्चालन हुनेछ । माघ ८ गते साँझ ५ बजेदेखि ७ बजेसम्म उम्मेदवारको प्रारम्भिक नामावली प्रकाशन गरिनेछ ।
त्यसैगरी माघ ९ गते बिहान १० बजेदेखि दिउँसो १ बजेसम्म उम्मेदवारले आफ्नो नाम फिर्ता लिन सक्नेछन् । माघ ९ गते दिउँसो १ बजेदेखि ३ बजेसम्म अन्तिम नामावली प्रकाशन गरिनेछ भने सोही दिन दिउँसो ४ बजेदेखि साँझ ७ बजेसम्म उम्मेदवारलाई निर्वाचन चिह्न प्रदान गर्ने कार्यक्रम तय गरिएको छ ।
आयोगले हालसम्म प्राप्त विवरणअनुसार पुरुष ३ हजार ८९, महिला ३९६ र तेस्रो लिङ्गी एक गरी कुल ३ हजार ४८६ उम्मेदवारको मनोनयन दर्ता भएको जनाएको छ ।
