भारत सरकारले माध्यमिक विद्यालय र कलेजस्तरमै १५ हजार विद्यालय र ५०० कलेजमा कन्टेन्ट क्रिएटर ल्याब स्थापना गर्ने घोषणा गरेर डिजिटल सीप विकासलाई प्राथमिकता दिएको छ।
यस पहलको मूल उद्देश्य युवालाई एनीमेसन, भिजुअल इफेक्ट्स, गेमिङ, कमिक्स र सामाजिक सञ्जालका लागि रील निर्माण जस्ता आधुनिक डिजिटल सीपमा दक्ष बनाउनु हो।
बजेटले स्पष्ट रूपमा देखाएको छ कि भारतले AVGC (Animation, Visual Effects, Gaming, Comics) उद्योगलाई २०३० सम्म २० लाख युवा दक्ष बनाउने लक्ष्य राखेको छ। यसले न केवल रोजगारी सिर्जना गर्नेछ, तर स्टार्टअप र नवप्रवर्तन प्रवर्द्धन गर्दै आर्थिक गतिशीलतामा सकारात्मक प्रभाव पार्ने अपेक्षा गरिएको छ। १० हजार करोड रुपैयाँको कोष र गेमिङ स्टार्टअप प्रोत्साहनले नयाँ उद्योग र रोजगार सृजना गर्ने दिशामा ठोस कदम चालेको छ।
यस योजनामा पाँच नयाँ इन्टर्नसिप कार्यक्रम, १० हजार नयाँ एआई/डीप–टेक फेलोसिप र २० प्रमुख पर्यटकीय स्थलमा टुरिस्ट गाइड तालिम समावेश हुनु युवा प्रतिभालाई व्यावसायिक अनुभव र व्यावहारिक दक्षतामा रूपान्तरण गर्ने दिशामा महत्त्वपूर्ण छ। साथै, राष्ट्रिय डिजिटल ज्ञान ग्रिड स्थापना गरेर स्थानीय अनुसन्धानकर्ता, इतिहासकार र कन्टेन्ट क्रिएटरका लागि स्थायी रोजगारी र अनुसन्धान अवसर सिर्जना गर्ने पहलले ज्ञान–आधारित अर्थतन्त्रको आधार तयार गर्नेछ।
युवामुखी यो पहलले वैज्ञानिक र रचनात्मक चेतनामा वृद्धि गर्दै नयाँ पुस्तामा आत्मविश्वास, नवप्रवर्तन क्षमता र उद्यमशीलता जागृत गर्ने सम्भावना राख्दछ। व्यक्तिले सिकेका डिजिटल सीपहरूलाई आफ्नो पेशा, उद्यम वा सामाजिक सञ्जाल सिर्जनामा प्रयोग गर्दा आर्थिक सक्रियता, आत्मनिर्भरता र वैयक्तिक सशक्तिकरण बढ्नेछ।
भारतको यो बजेट केवल औपचारिक शिक्षा सुधार मात्र नभई डिजिटल क्रान्ति, आर्थिक वृद्धिको नयाँ मार्ग र वैयक्तिक सृजनात्मक जागरणका लागि रणनीतिक पहल हो। सक्षम नेतृत्वमा कार्यान्वयन भएमा यसले नयाँ पुस्तालाई रोजगारी, उद्यमशीलता र रचनात्मक आत्मविश्वास दुवैमा सशक्त बनाउन महत्वपूर्ण भूमिका खेल्नेछ।
