काठमाडौँ । त्रिभुवन अन्तर्राष्ट्रिय विमानस्थलको संवेदनशील क्षेत्रमा यात्रुहरूलाई दुःख हैरानी दिने, जबरजस्ती तान्ने र ठगी गर्ने गिरोहमाथि प्रहरीले निगरानी बढाएको छ।
काठमाडौँ महानगरपालिका–९ स्थित विमानस्थल क्षेत्रबाट यात्रुहरूलाई प्रलोभनमा पारी ठगी गरेको आरोपमा प्रहरीले १८ जनालाई नियन्त्रणमा लिएको हो। जिल्ला प्रहरी परिसर काठमाडौँका प्रवक्ता एसपी पवन भट्टराईका अनुसार विमानस्थलको सुरक्षा र यात्रुको सहजतालाई लक्षित गरी खटिएको टोलीले उनीहरूलाई पक्राउ गरेको हो।
पक्राउ पर्नेहरूमा देशका विभिन्न जिल्लाबाट आई विमानस्थल वरपर बसोबास गर्ने १८ देखि ६० वर्ष उमेर समूहका व्यक्तिहरू रहेका छन्। प्रहरीको प्रारम्भिक अनुसन्धान अनुसार यी व्यक्तिहरूले वैदेशिक रोजगारीबाट फर्केका तथा आन्तरिक यात्रुहरूलाई जबरजस्ती तान्ने, भ्रमपूर्ण प्रलोभन देखाएर आफू निकटका होटलमा लैजाने र यात्रु तथा होटल दुवै पक्षबाट मोटो रकम कमिसनका रूपमा असुल्ने धन्दामा संलग्न रहेको पाइएको छ।
यसका साथै, उनीहरूले सार्वजनिक स्थलमा आपसमा झगडा गर्ने र यात्रुहरूमाथि अभद्र व्यवहार गरी विमानस्थलको मर्यादामा समेत खलल पुर्याउँदै आएका थिए। विमानस्थल क्षेत्रमा हुने यस्ता गतिविधिले नेपालको अन्तर्राष्ट्रिय छविमा नकारात्मक असर पुर्याइरहेको विज्ञहरू बताउँछन्। विशेष गरी पहिलो पटक नेपाल आउने पर्यटक वा थकित भएर फर्किने श्रमिकहरू यस्ता ‘बिचौलिया’हरूको पहिलो निसानामा पर्ने गरेका छन्।
प्रहरीको यो सक्रियताले विमानस्थलमा हुने असुलीसँगै संगठित रूपमा मौलाउँदै गएको ‘कमिसनतन्त्र’लाई निरुत्साहित गर्ने अपेक्षा गरिएको छ। पक्राउ परेका १८ जनालाई कानुनी कारबाहीको दायरामा ल्याउँदै प्रहरीले विमानस्थल क्षेत्रलाई पूर्णतः सुरक्षित र बिचौलियामुक्त बनाउन अपरेसनलाई निरन्तरता दिने सङ्केत गरेको छ।
