काठमाडौँ । नेपाल विद्युत् प्राधिकरणले रसुवाको भोटेकोशी नदीमा आएको विनाशकारी बाढीमा बेपत्ता भएका आफ्ना कर्मचारी तथा कामदारका परिवारलाई तत्काल राहत उपलब्ध गराउने निर्णय गरेको छ ।
बाढीका कारण रसुवामा सञ्चालित १३ वटा जलविद्युत् आयोजनामा क्षति पुगेको छ । बाढीपछि विभिन्न आयोजनामा कार्यरत कर्मचारी तथा कामदारसमेत बेपत्ता भएका छन् । प्राधिकरणका अनुसार प्राधिकरणअन्तर्गत मात्रै ४७ जना कर्मचारी तथा कामदार बेपत्ता छन् ।
ऊर्जा, जलस्रोत तथा सिँचाइमन्त्री विराज भक्त श्रेष्ठको अध्यक्षतामा बुधबार साँझ बसेको प्राधिकरण सञ्चालक समितिको बैठकले बेपत्ता कर्मचारी तथा कामदारका आश्रित परिवारलाई राहत उपलब्ध गराउने निर्णय गरेको हो ।
सञ्चालक समिति सदस्य अंशुकिरण शाहीका अनुसार बेपत्ता व्यक्तिको खोजी, परिवारको धार्मिक तथा सामाजिक संस्कार र दैनिक जीवनयापनमा सहयोग पुर्याउने उद्देश्यले राहत प्याकेज ल्याइएको हो ।
निर्णयअनुसार तत्काल राहतस्वरूप बेपत्ता भएका स्थायी कर्मचारी, ज्यालादारी तथा सेवा करारका कामदारका नजिकका हकवालालाई जनही ५० हजार रुपैयाँ उपलब्ध गराइनेछ ।
त्यस्तै, स्थायी कर्मचारीका हकवालालाई अर्को क्षतिपूर्तिसम्बन्धी निर्णय नभएसम्म वा बढीमा ६ महिनासम्म निर्वाह रकम उपलब्ध गराउने निर्णय भएको छ । भदौदेखि लागू हुने गरी बेपत्ता कर्मचारीको तहअनुसारको सुरु तलब स्केलको ५० प्रतिशत रकम निर्वाहस्वरूप उपलब्ध गराइने प्राधिकरणले जनाएको छ ।
