लुम्बिनी प्रदेशको रुपन्देही जिल्लामा उच्च प्रभाव सामुदायिक विकास परियोजनाअन्तर्गत नयाँगाउँ माध्यमिक विद्यालयको भवन निर्माणको शिलान्यास आज सम्पन्न भएको छ ।
बुटवल उपमहानगरपालिका–१२ स्थित नयाँगाउँ माध्यमिक विद्यालय भवन निर्माणको शिलान्यास काठमाडौंस्थित भारतीय राजदूतावासका प्रथम सचिव श्री सुमन शेखर र बुटवल उपमहानगरपालिकाका मेयर श्री खेलराज पाण्डेले संयुक्त रूपमा गरेका हुन् ।
उक्त विद्यालय भवन भारत सरकारको करिब ४.४ करोड रुपैयाँको आर्थिक सहयोगमा निर्माण हुन लागेको हो । निर्माण हुने नयाँ भौतिक संरचनामा कक्षा कोठा, शौचालय तथा अन्य सहयोगी संरचना सहित दुईवटा दुईतले विद्यालय भवन रहनेछन् ।
यो परियोजना उच्च प्रभाव सामुदायिक विकास परियोजनाको रूपमा अघि बढाइएको हो र यसको कार्यान्वयन बुटवल उपमहानगरपालिका, रुपन्देहीमार्फत गरिनेछ ।
शिलान्यास कार्यक्रममा नगरप्रमुख, विद्यालय व्यवस्थापन समिति तथा अन्य सरोकारवालाहरूले भारत सरकारले निरन्तर प्रदान गर्दै आएको विकास सहयोगको प्रशंसा गरे ।
कार्यक्रममा नेपाल र भारतबीच छिमेकी तथा विकास साझेदारको रूपमा व्यापक र बहुक्षेत्रीय सहकार्य रहँदै आएको उल्लेख गरियो । उच्च प्रभाव सामुदायिक विकास परियोजनाको कार्यान्वयनले नेपाल सरकारको समृद्धि र विकासका प्रयासलाई थप मजबुत बनाउने विश्वास व्यक्त गरिएको छ ।
