सुदूरपश्चिम प्रदेशको बझाङ जिल्लामा उच्च प्रभाव सामुदायिक विकास परियोजनाअन्तर्गत श्री सत्यवादी माध्यमिक विद्यालयको प्रशासकीय तथा छात्रावास भवन निर्माणको शिलान्यास आज सम्पन्न भएको छ ।
जयपृथ्वी नगरपालिका–भोपुरमा अवस्थित श्री सत्यवादी माध्यमिक विद्यालयमा निर्माण हुने भवनको शिलान्यास काठमाडौंस्थित भारतीय राजदूतावासका प्रथम सचिव श्री नारायण सिंह र जयपृथ्वी नगरपालिकाका मेयर श्री चेतराज बजालले संयुक्त रूपमा गरेका हुन् ।
उक्त प्रशासकीय तथा छात्रावास भवन भारत सरकारको करिब १३.९ करोड रुपैयाँको आर्थिक सहयोगमा निर्माण हुन लागेको हो ।
नयाँ पूर्वाधारमा तीनतले प्रशासकीय ब्लक, छात्र तथा छात्राका लागि छुट्टाछुट्टै छात्रावास, शौचालय तथा अन्य सहयोगी संरचनाहरू समावेश हुनेछन् । यो परियोजना उच्च प्रभाव सामुदायिक विकास परियोजनाको रूपमा अघि बढाइएको हो र यसको कार्यान्वयन जयपृथ्वी नगरपालिका, बझाङमार्फत गरिनेछ ।
शिलान्यास कार्यक्रममा नगरप्रमुख, विद्यालय व्यवस्थापन समिति तथा अन्य सरोकारवालाहरूले भारत सरकारले निरन्तर प्रदान गर्दै आएको विकास सहयोगको प्रशंसा गरे ।
कार्यक्रममा नेपाल र भारतबीच छिमेकी तथा विकास साझेदारका रूपमा व्यापक र बहुक्षेत्रीय सहकार्य रहँदै आएको उल्लेख गरियो । उच्च प्रभाव सामुदायिक विकास परियोजनाको कार्यान्वयनले नेपाल सरकारको समृद्धि र विकासका प्रयासलाई थप मजबुत बनाउने विश्वास व्यक्त गरिएको छ ।
