आगामी फेब्रुअरी–मार्चमा भारत र श्रीलंकामा आयोजना हुने आईसीसी टी–२० विश्वकप क्रिकेट प्रतियोगितामा सहभागी हुन जाने नेपाली राष्ट्रिय टोलीलाई औपचारिक रूपमा बिदाइ गरिएको छ। नेपाल क्रिकेट संघ (क्यान) ले शनिबार विशेष कार्यक्रमको आयोजना गर्दै टोलीलाई बिदाइ गरेको हो।
विश्वकपअघि श्रीलंका र भारतमा अभ्यास शृंखला खेल्ने कार्यतालिका रहेकाले नेपाली टोलीलाई शनिबार नै औपचारिक बिदाइ गरिएको क्यानले जनाएको छ। टोली आइतबार त्यसतर्फ प्रस्थान गर्नेछ।
बिदाइ कार्यक्रममा बोल्दै क्यान सचिव पारस खड्काले नेपाली टोलीले विश्वकपमा उत्कृष्ट प्रदर्शन गर्ने विश्वास व्यक्त गर्दै खेलाडी तथा व्यवस्थापन टिमलाई शुभकामना दिए। उनले भने, “यो विश्वकै ध्यान केन्द्रित हुने प्रतियोगिता हो। नेपाली क्रिकेट सही दिशामा अघि बढिरहेको छ। विश्वकपका लागि सम्पूर्ण टोलीलाई शुभकामना छ। भारतमा रहेका समर्थकहरूले पनि टोलीलाई साथ दिने विश्वास छ।”
कप्तान रोहित पौडेलले टोलीको तयारी सन्तोषजनक रहेको बताउँदै अभ्यास खेलहरूले सकारात्मक लय निर्माण भएको उल्लेख गरे। उनले भने, “तयारी राम्रो भइरहेको छ। अभ्यासले राम्रो बिल्डअप भएको महसुस भइरहेको छ। सन् २०२५ नेपाली क्रिकेटका लागि राम्रो रह्यो। आशा छ, यो वर्ष पनि उत्कृष्ट हुनेछ। हामी सम्पूर्ण नेपालीलाई गर्व महसुस गराउने प्रयास गर्नेछौं।”
प्रमुख प्रशिक्षक स्टुअर्ट लले अभ्यास शृंखलाबाट रणनीति अन्तिम रूप दिइने र विश्वकपमा प्रतिस्पर्धात्मक प्रदर्शन गर्ने लक्ष्य रहेको बताए। “अभ्यास खेलमार्फत हाम्रो योजना अझ स्पष्ट हुनेछ। विश्वकपमा राम्रो खेल्दै नेपाली समर्थकलाई खुसी दिन चाहन्छौं,” उनले भने।
क्यान अध्यक्ष चतुरबहादुर चन्दले पनि टोलीको तयारी सन्तोषजनक रहेको जनाउँदै भारतको पिच र मौसम नेपाली टोलीका लागि अनुकूल हुने विश्वास व्यक्त गरे। “तयारी राम्रो देखिएको छ। भारतको कन्डिसन पनि मिल्दोजुल्दो छ। राम्रो प्रदर्शन गर्नुहोला, टोलीलाई शुभकामना,” उनले भने।
नेपाली टोलीले विश्वकपको समूह चरणमा इंग्ल्यान्ड, वेस्ट इन्डिज, बंगलादेश र इटलीसँग प्रतिस्पर्धा गर्ने तालिका छ। प्रतियोगिताअघि टोली श्रीलंका पुगेर श्रीलंका ‘ए’ टोलीसँग तथा भारतमा मुम्बई क्रिकेट संघ (एमसीए) प्रेसिडेन्ट ११ सँग अभ्यास खेल खेल्ने कार्यक्रम रहेको छ।
