राष्ट्रिय स्वतन्त्र पार्टी (रास्वपा) ले कास्कीका दुई वटा निर्वाचन क्षेत्रमा उम्मेदवार टुंगो लगाएको छ।
फागुन २१ गते हुन गइरहेको प्रतिनिधि सभा निर्वाचनका लागि कास्की–१ बाट गनेस पौडेल र कास्की–२ बाट उत्तम पौडेललाई उम्मेदवार बनाएको हो। कास्की–३ मा भने उम्मेदवार टुंगो लाग्न बाँकी रहेको रास्वपा गण्डकीका महामन्त्री नवीन त्रिपाठीले बताए।
कास्की–१ बाट उम्मेदवार बनेका गनेस लेखक हुन्। यसअघि उनी २०७९ को निर्वाचनमा पोखरा महानगरपालिकाको मेयर पदमा स्वतन्त्र उम्मेदवार बनेका थिए। काठमाडौं महानगरपालिकाका मेयर बालेन शाहका तर्फबाट रास्वपा केन्द्रीय सदस्य बनेका गनेसलाई उनकै टिमबाट प्रतिनिधि सभा सदस्य उम्मेदवारको टिकट प्रदान गरिएको हो।
कास्की–२ बाट उम्मेदवार बनेका उत्तम पौडेल रास्वपाको केन्द्रीय सार्वजनिक मामिला विभागका सदस्य हुन्। रास्वपा सभापति रवि लामिछाने सञ्चारकर्ममा रहँदा उत्तम कास्की संवाददाता थिए। रवि न्युज २४ र ग्यालेक्सी टेलिभिजनमा रहँदा उत्तमले कास्कीबाट रिपोर्टिङ गर्थे।
