भारतीय जनता पार्टी (भाजपा) को राष्ट्रिय अध्यक्षमा नितिन नवीन निर्विरोध चयन भएका छन्। भारतीय सञ्चार माध्यमका अनुसार मंगलबार भाजपा मुख्यालयमा उनको अध्यक्ष निर्वाचित हुने औपचारिक घोषणा गरिएको हो।
भाजपाका नवनिर्वाचित अध्यक्ष नितिन नवीन लाई भारतका प्रधानमन्त्री नरेन्द्र मोदीले माला लगाएर स्वागत गरे। मोदीले समारोहमा भने, “भाजपा यस्तो पार्टी हो जहाँ अनुभवभन्दा पनि कार्यकर्ता भावना महत्वपूर्ण हुन्छ। मले अहिलेसम्म पार्टीमा सानै उमेरमा मुख्यमन्त्रीदेखि प्रधानमन्त्रीसम्मको यात्रा गरेको अनुभव छ, तर म सदैव पार्टीको समर्पित कार्यकर्ता नै रहन्छु। नितिनजी मेरो वरिष्ठ नेता हुनुहुन्छ, म कार्यकर्ता हुँ।”
सोमबार पार्टी मुख्यालयमा अध्यक्ष पदका लागि चुनाव आयोजना गरिएको थियो। अन्य कुनै पनि उम्मेदवारले उम्मेदवारी दर्ता नगरेको कारण नितिन नवीन निर्विरोध निर्वाचित भएका हुन्।
नितिन नवीन यसअघि २०२५ डिसेम्बर १४ देखि पार्टीको कार्यवाहक अध्यक्षको रूपमा कार्यरत थिए। उनका समर्थकहरूले नवीनलाई पार्टीको संगठनात्मक क्षमता, युवा नेतृत्व र विभिन्न क्षेत्रीय इकाइहरूसँगको सशक्त सम्बन्धका कारण उपयुक्त नेतृत्व मानिरहेका छन्।
विशेषज्ञहरूको अनुमानअनुसार, नितिन नवीनको अध्यक्षतामा भाजपा आगामी चुनाव र संगठनात्मक संरचनामा नयाँ उर्जा र रणनीतिक पुनर्संरचना हुने अपेक्षा गरिएको छ।
