स्रोतका अनुसार निष्कासनमा परेका नेपालीहरू अवैध रूपमा अमेरिका प्रवेश गरेका वा त्यहाँको अध्यागमन कानुन उल्लङ्घन गरेको आरोपमा कारबाहीमा परेका हुन्। केही नेपालीहरू तल्लो बाटो (ह्युमन ट्राफिकिङ र अवैध आप्रवासन मार्ग) हुँदै अमेरिका पुगेका थिए भने केही भिसा अवधि सकिएपछि पनि बसिरहेकाले निष्कासनको प्रक्रियामा परेका थिए।
अमेरिकी अध्यागमन तथा भन्सार प्रवर्तन निकाय (ICE) ले उनीहरूलाई पक्राउ गरी आवश्यक अनुसन्धान र कानुनी प्रक्रिया पूरा गरेपछि निष्कासन गरेको बताइएको छ।
त्रिभुवन अन्तर्राष्ट्रिय विमानस्थलमा अवतरणपछि निष्कासित नेपालीहरूलाई अध्यागमन कार्यालयले थप अनुसन्धानका लागि प्रहरीको जिम्मा लगाएको छ। प्रारम्भिक सोधपुछपछि मानव तस्करी, दलाल संलग्नता तथा अवैध यात्रा प्रक्रियासम्बन्धी विषयमा अनुसन्धान गरिने बताइएको छ।
हालैका महिनाहरूमा अमेरिकाले गैरकानुनी आप्रवासन नियन्त्रण कडा बनाएसँगै नेपाली नागरिकको निष्कासन संख्या पनि बढ्दै गएको देखिएको छ। विज्ञहरूका अनुसार अवैध बाटो प्रयोग गरेर विदेश जाने प्रवृत्तिले युवाहरूलाई कानुनी जोखिमसँगै आर्थिक तथा मानसिक समस्यामा पारिरहेको छ।
