अमेरिकाका राष्ट्रपति डोनाल्ड ट्रम्पले फ्रान्सेली वाइनमा २०० प्रतिशत भन्सार महसुल लगाउने घोषणा गरेपछि फ्रान्सका राष्ट्रपति इमानुएल म्याक्रोनले कडा प्रतिक्रिया दिएका छन् ।
स्विट्जरल्यान्डको डाभोसमा मंगलबार सम्पन्न विश्व आर्थिक मञ्च (World Economic Forum) को सत्रमा सम्बोधन गर्दै राष्ट्रपति म्याक्रोनले फ्रान्स धम्कीको राजनीति होइन, आपसी सम्मान र सहकार्यमा विश्वास गर्ने देश भएको स्पष्ट पारे ।
ग्रिनल्यान्ड विवादसँग जोडेर युरोपविरुद्ध थप प्रतिबन्ध लगाउने अमेरिकी चेतावनीप्रति असहमति जनाउँदै म्याक्रोनले यस्ता कदमहरू अनुचित र अस्वीकार्य भएको बताए ।
कुनै देशको भूमि, सार्वभौमिकता र स्वतन्त्रतामाथि दबाब सिर्जना गर्न आर्थिक हतियार प्रयोग गर्नु गलत भएको टिप्पणी गर्दै उनले यस्तो अभ्यास कुनै पनि अवस्थामा स्वीकार गर्न नसकिने धारणा व्यक्त गरे ।
उनले अन्तर्राष्ट्रिय कानुनको महत्व औंल्याउँदै भने, ‘जहाँ शक्तिशाली राष्ट्रहरूले आफूअनुकूल नियम बनाउँछन् र कमजोर देशहरू पीडित बन्न बाध्य हुन्छन्, त्यो संसार अत्यन्त खतरनाक हुन्छ।’
म्याक्रोनको भनाइले अन्तर्राष्ट्रिय व्यापार, कूटनीति र शक्ति सन्तुलनको विषयमा बढ्दो तनावप्रति युरोपको चिन्ता स्पष्ट रूपमा उजागर गरेको छ ।
