फागुन २१ गते हुन लागेको प्रतिनिधिसभा सदस्य निर्वाचनका लागि चितवन जिल्लामा ६५ जनाले उम्मेदवारी दर्ता गराएका छन् ।
मंगलबार चितवनका तीनवटै प्रतिनिधिसभा सदस्य निर्वाचन क्षेत्रमा उम्मेदवारी दर्ता भएको मुख्य निर्वाचन अधिकृतको कार्यालयले जनाएको छ । चितवन जिल्लामा तीन निर्वाचन क्षेत्र रहेका छन् र ती तीन सिटका लागि ६५ जनाको उम्मेदवारी परेको हो ।
कार्यालयका अनुसार निर्वाचन क्षेत्र नम्बर १ मा १९ जना, क्षेत्र नम्बर २ मा २३ जना र क्षेत्र नम्बर ३ मा २३ जनाले उम्मेदवारी दर्ता गराएका छन् ।
उम्मेदवारमध्ये निर्वाचन क्षेत्र नम्बर १ मा चार जना तथा क्षेत्र नम्बर २ र ३ मा छ–छ जना स्वतन्त्र उम्मेदवार रहेका छन् । बाँकी उम्मेदवार विभिन्न राजनीतिक दलबाट प्रतिनिधित्व गर्ने रहेको निर्वाचन अधिकृतको कार्यालयले जनाएको छ ।
उम्मेदवारीको संख्या उच्च रहेसँगै चितवनमा निर्वाचन प्रतिस्पर्धा थप चर्किने संकेत देखिएको छ । आगामी दिनमा उम्मेदवारहरूको प्रचारप्रसार गतिविधि तीव्र हुने अपेक्षा गरिएको छ ।
