महिला ट्वान्टी–२० विश्वकप ग्लोबल छनोट प्रतियोगितामा बंगलादेश, थाइल्यान्ड र नेदरल्यान्ड्सले लगातार दोस्रो जित हात पारेका छन् । यी नतिजाले उनीहरूलाई सुपर सिक्स चरणतर्फ अग्रसर बनाएको छ । प्रतियोगितामा अमेरिकाले पहिलो विजय हात पारेको छ ।
समूह ‘ए’ मा दाबेदार बंगलादेशले पपुवा न्युगिनीलाई ३० रनले पराजित गरेको छ । कीर्तिपुरस्थित त्रिवि अन्तर्राष्ट्रिय क्रिकेट रंगशालामा टस हारेर ब्याटिङ गर्न आएपछि बंगलादेशले निर्धारित २० ओभरमा ५ विकेट गुमाएर १ सय ६८ रन बनायो । ओपनर दिलारा अक्तरले ३५ र शोर्ना अक्तरले ३७ रन बनाए । पपुवा न्युगिनीले जवाफमा ९ विकेट गुमाउँदै १ सय ३८ रन मात्र बनाउन सक्यो ।
दोस्रो खेलमा चार पटक ट्वान्टी–२० विश्वकप खेलिसकेको नेदरल्यान्ड्सले स्कटल्यान्डमाथि ७ रनको रोमाञ्चक जित हात पारेको थियो । स्टेरे कालिसले ६० बल खेल्दै १४ चौका र १ छक्कासहित अविजित ८७ रन बनाएपछि नेदरल्यान्ड्सले निर्धारित २० ओभरमा ६ विकेट गुमाएर १ सय ५७ रन बनायो । जबाफमा स्कटल्यान्डले ५ विकेट गुमाएर १ सय ५० रन मात्र बनाउन सक्यो ।
मूलपानी मैदानमा भएको खेलमा थाइल्यान्डले जिम्बावेलाई अन्तिम बलमा रनआउट गर्दै १ रनको रोमाञ्चक जित हात पारेको छ । नानापाट कोन्चारोइन्काईले ५२ बलमा ५ चौका प्रहार गर्दै ५४ रन बनाए । थाइल्यान्डले निर्धारित ओभरमा ७ विकेट गुमाएर १ सय १५ रन बनाएको थियो । जिम्बावेले ६ विकेट गुमाउँदै १ सय १४ रन मात्र बनाउन सक्यो ।
प्रतियोगितामा सबैभन्दा तल्लो वरीयताको अमेरिकाले मूलपानीमा भएको दोस्रो खेलमा नामिबियालाई ४ विकेटले हरायो । नामिबियाले ६ विकेट गुमाएर १ सय ४४ रन बनाएको थियो । अमेरिकी ओपनर इला क्लारिजले ५१ बलमा १० चौका र १ छक्का प्रहार गरी ७० रन बनाएपछि अमेरिका ४ बल अघि लक्ष्य पूरा गर्न सफल भयो ।
प्रतियोगिता जारी रहँदा शीर्ष टोलीहरूको लगातार विजयी र रोमाञ्चक खेलले दर्शकलाई उत्साहित बनाइरहेको छ । सुपर सिक्स चरणमा प्रवेश गर्ने टोलीहरूले आगामी खेलमा आफ्नो दाबेदारी अझ बलियो बनाउने अपेक्षा गरिएको छ ।
