आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै निर्वाचन आयोगले यसपटक पनि ‘कल सेन्टर’ सञ्चालनमा ल्याएको छ । विगतका निर्वाचनमा जस्तै यसपटक पनि मतदाता र सरोकारवालाको जिज्ञासा समाधान गर्ने उद्देश्यले आयोगले यो सेवा सुरु गरेको हो ।
निर्वाचन आयोगको कार्यालय, कान्तिपथमा स्थापना गरिएको उक्त कल सेन्टरबाट निर्वाचनसँग सम्बन्धित विभिन्न विषयमा मतदाता, नागरिक तथा सरोकार भएका व्यक्तिहरूका जिज्ञासा सुनुवाइ गरिने आयोगका प्रवक्ता नारायणप्रसाद भट्टराईले जानकारी दिए ।
उनका अनुसार कल सेन्टरमा ६ वटा डेस्क सञ्चालनमा रहेका छन् । यो सेवा बिहान ९ बजेदेखि साँझ ६ बजेसम्म उपलब्ध हुनेछ । मतदाता तथा सर्वसाधारणले निःशुल्क टोल–फ्री नम्बर ११०२ मा फोन गरेर निर्वाचनसम्बन्धी जानकारी, गुनासो तथा सुझाव राख्न सक्नेछन् ।
आयोगका अनुसार एकै समयमा १५ जनासम्मले फोन गर्दा पनि कल होल्डमा नपर्ने गरी प्रविधिगत व्यवस्था मिलाइएको छ । यसले मतदातालाई सहज, छिटो र प्रभावकारी सेवा उपलब्ध गराउने अपेक्षा गरिएको छ ।
निर्वाचन आयोगले पारदर्शी, निष्पक्ष र सहभागितामूलक निर्वाचन सुनिश्चित गर्न सूचना प्रवाहलाई प्राथमिकतामा राख्दै आएको जनाएको छ । कल सेन्टर सेवा त्यसैको एक महत्वपूर्ण माध्यमका रूपमा प्रयोग हुने आयोगको भनाइ छ ।
