नागरिक उन्मुक्ति पार्टीका संरक्षक तथा कैलाली निर्वाचन क्षेत्र नम्बर १ का प्रतिनिधिसभा सदस्य उम्मेदवार रेशम चौधरीविरुद्ध निर्वाचन अधिकृतको कार्यालयमा उजुरी दर्ता भएको छ ।
नेपाली कम्युनिस्ट पार्टीका तर्फबाट उम्मेदवार रामलाल डंगौराले चौधरीको मनोनयन दर्ता बदर गर्नुपर्ने मागसहित उजुरी दर्ता गराएका हुन् । निर्वाचन अधिकृतको कार्यालयले यस विषयमा जानकारी दिँदै उजुरीको प्रक्रिया अघि बढाइएको जनाएको छ ।
टीकापुर घटनामा जन्मकैद सजाय पाएका चौधरी राष्ट्रपति रामचन्द्र पौडेलको आममाफीपछि रिहा भएका थिए । सो पृष्ठभूमिलाई आधार बनाउँदै उजुरीकर्ताले उम्मेदवारी योग्यतामाथि प्रश्न उठाएको जनाइएको छ ।
निर्वाचन अधिकृतको कार्यालयले उजुरीसँग सम्बन्धित प्रमाण तथा आवश्यक कागजात पेश गर्न बिहीबारसम्मको समयसीमा तोकेको छ । प्राप्त प्रमाणका आधारमा कानुनी प्रक्रिया अनुसार निर्णय लिइने कार्यालयले जनाएको छ ।
यो घटनाले कैलाली क्षेत्र नम्बर १ मा चुनावी प्रतिस्पर्धासँगै कानुनी तथा राजनीतिक बहसलाई समेत थप चर्काउने संकेत देखिएको छ ।
