आगामी फागुन २१ गते हुने प्रतिनिधिसभा निर्वाचनको तयारीलाई सहयोग पुर्याउने उद्देश्यले भारत सरकारले नेपाललाई पहिलो चरणको चुनावी सहयोग हस्तान्तरण गरेको छ ।
मंगलबार गृह मन्त्रालयमा आयोजित विशेष समारोहबीच काठमाडौँस्थित भारतीय दूतावासका कार्यवाहक राजदूत डा. राकेश पाण्डेले गृहमन्त्री ओमप्रकाश अर्याललाई ६० भन्दा बढी ‘डबल–क्याब’ पिकअप गाडी तथा अन्य आवश्यक सामग्री हस्तान्तरण गरेका हुन् ।
नेपाल सरकारले आसन्न निर्वाचनका लागि गरेको अनुरोध अनुसार भारतले करिब ६५० वटा सवारीसाधन उपलब्ध गराउने प्रतिबद्धता जनाएको छ, जस अन्तर्गत यो पहिलो खेप हस्तान्तरण गरिएको हो । बाँकी सवारीसाधनहरू आगामी केही हप्ताभित्र विभिन्न चरणमा नेपाल आइपुग्ने भारतीय दूतावासले जानकारी दिएको छ ।
सहयोग ग्रहण गर्दै गृहमन्त्री अर्यालले भारत सरकार तथा भारतीय जनतालाई धन्यवाद ज्ञापन गर्दै यस सहयोगले निर्वाचनको तयारी र व्यवस्थापनमा महत्वपूर्ण टेवा पुग्ने विश्वास व्यक्त गरे । उनले नेपाल–भारतबीचको गहिरो, ऐतिहासिक र बहुआयामिक सम्बन्धलाई थप सुदृढ बनाउने दिशामा यो सहयोग उल्लेखनीय भएको पनि बताए ।
सन् २००८ देखि भारतले नेपालको निर्वाचन प्रक्रियामा निरन्तर सहयोग गर्दै आएको छ । यस अवधिमा निर्वाचन आयोग तथा विभिन्न सरकारी निकायलाई करिब २४ सय सवारीसाधन उपहार स्वरूप प्रदान गरिसकिएको छ ।
भारतीय दूतावासले यो सहयोग दुई देशबीचको बहुआयामिक विकास साझेदारीको प्रतिबिम्ब मात्र नभई नेपाल र भारतका जनताबीचको अटुट विश्वास, मित्रता र सहकार्यको प्रतीकसमेत भएको उल्लेख गरेको छ ।
