प्रतिनिधिसभा निर्वाचनका लागि मनोनयनपत्र दर्ता गरेका उम्मेदवारमाथि निर्वाचन आयोगले जाँचबुझ प्रक्रिया तीव्र पारेको छ। आयोगले बुधबार दिउँसोदेखि नै उम्मेदवारका मनोनयनपत्र तथा परेका उजुरीमाथि औपचारिक जाँचबुझ सुरु गरेको हो।
निर्वाचन आयोगका सहायक प्रवक्ता कुलबहादुर जिसीका अनुसार आज साँझ ५ बजेदेखि ७ बजेसम्म उम्मेदवारको प्रारम्भिक नामावली प्रकाशन गरिनेछ।
निर्वाचन कार्यतालिका अनुसार आज मनोनयनपत्र र उजुरीमाथि जाँचबुझ तथा निर्णय गरी नामावली सार्वजनिक गरिनेछ। माघ ९ गते शुक्रबार बिहान १० बजेदेखि दिउँसो १ बजेसम्म उम्मेदवारले आफ्नो नाम फिर्ता लिन सक्नेछन्।
त्यसै दिन दिउँसो १ बजेदेखि ३ बजेसम्म अन्तिम नामावली प्रकाशन गरिनेछ भने दिउँसो ४ बजेदेखि साँझ ७ बजेसम्म उम्मेदवारलाई निर्वाचन चिन्ह प्रदान गरिने कार्यक्रम तय गरिएको छ।
शुक्रबार देशभर रहेका ७७ मुख्य निर्वाचन अधिकृतको कार्यालय र ८८ निर्वाचन अधिकृतको कार्यालयमार्फत यी कार्यक्रम एकैसाथ सञ्चालन गरिने निर्वाचन आयोगले जनाएको छ।
आयोगमा प्राप्त विवरणअनुसार देशभरबाट कुल तीन हजार ४८७ जनाले उम्मेदवारी दर्ता गराएका छन्। तीमध्ये ३ हजार ८९ जना पुरुष, ३९६ जना महिला र १ जना तेस्रो लिङ्गी उम्मेदवार रहेका छन्।
यसमध्ये चार जिल्लाका पाँच उम्मेदवारविरुद्ध उजुरी परेको छ। सुनसरी निर्वाचन क्षेत्र नं २ का एक, रौतहट निर्वाचन क्षेत्र नं १ का एक, भक्तपुर निर्वाचन क्षेत्र नं २ का दुई र कैलाली निर्वाचन क्षेत्र नं १ का एक उम्मेदवारमाथि उजुरी दर्ता भएको आयोगले जनाएको छ।
यी उजुरीमाथि सम्बन्धित निर्वाचन अधिकृतको कार्यालयमार्फत विस्तृत जाँचबुझ भइरहेको छ। आयोगले कानुनी प्रक्रिया पूरा गरी आवश्यक निर्णय लिने तयारी गरेको छ।
