भक्तपुरको मध्यपुरथिमी नगरपालिका–२ सानोठिमीस्थित बाल सुधार गृहमा बिहीबार राति कुटाकुटसहित आगजनी र तोडफोडको घटना भएपछि केही समय स्थिति तनावग्रस्त बनेको छ। राति करिब १० बजेतिर बाल सुधार गृहमा राखिएका दुई समूहबीच विवाद चर्किएर झडपमा परिणत भएको हो।
जिल्ला प्रहरी परिसर भक्तपुरका डीएसपी प्रकाश जवेगुले दुई पक्षबीच झडप भएपछि तत्काल सुरक्षाकर्मी परिचालन गरी अवस्था नियन्त्रणमा लिइएको जानकारी दिएका छन्। उनका अनुसार हाल अवस्था सामान्य भइसकेको छ। तर स्थिति नियन्त्रणमा लिन पुगेका सुरक्षाकर्मीमाथि समेत ढुंगा र इँटा प्रहार भएको थियो, जसका कारण दुई जना सुरक्षाकर्मी घाइते भएका छन्।
झडपका क्रममा कुटपिट हुँदा बाल सुधार गृहभित्र रहेका १३ जना घाइते भएका छन्। घाइतेमध्ये एक जनाको अवस्था गम्भीर रहेको र उनी बेहोस अवस्थामा उपचाररत रहेको प्रहरीले जनाएको छ। अन्य घाइतेहरूको उपचार भइरहेको छ।
दुई समूहबीच विवाद के कारणले सुरु भयो भन्ने विषय अझै खुल्न सकेको छैन। घटनाको कारण पत्ता लगाउन प्रहरीले विस्तृत अनुसन्धान सुरु गरेको जनाएको छ।
बाल सुधार गृहमा हाल एक बालिकासहित १६४ जना रहेका थिए। घटनापछि सुरक्षाका कारण उनीहरूलाई अस्थायी रूपमा भक्तपुर र काठमाडौं जिल्ला प्रहरी परिसरका बाल निगरानी कक्षामा सारिएको छ। यससँगै सुधार गृह परिसरमा थप सुरक्षा सतर्कता बढाइएको छ।
झडपका क्रममा भएको आगजनी र तोडफोडबाट सुधार गृहमा कति क्षति भयो भन्ने पूर्ण विवरण आउन बाँकी रहेको थिमी प्रहरीले जनाएको छ। प्रहरीले घटनामा संलग्न व्यक्तिहरू पहिचान गरी आवश्यक कानुनी कारबाही प्रक्रिया अगाडि बढाइरहेको बताएको छ।
