निर्वाचन आयोगले निर्वाचन आचारसंहिता उल्लंघन गरेको आरोपमा नेपाली कम्युनिस्ट पार्टी (नेकपा) का नेता तथा जाजरकोटबाट प्रतिनिधिसभा उम्मेदवार शक्ति बस्नेतसँग औपचारिक रूपमा स्पष्टीकरण माग गरेको छ।
आयोगका अनुसार बस्नेतविरुद्ध परेको उजुरीमाथि प्रारम्भिक छानबिन गर्दा चुनावी प्रचारका क्रममा बाजागाजा बजाउँदै आचारसंहिता विपरीत गतिविधि गरेको प्रमाण देखिएको छ।
निर्वाचन आयोगले सार्वजनिक गरेको विवरणअनुसार प्रचार अभियानका क्रममा बाजागाजा बजाइरहेको समूहका सदस्यहरूलाई पाँच सय रुपैयाँ दरका नोटहरू वितरण गरेको दृश्य प्रमाणका आधारमा आयोगले स्पष्टीकरण सोधेको हो।
आयोगको पत्रमा यस्तो कार्य निर्वाचन स्वच्छता, निष्पक्षता र समान प्रतिस्पर्धाको सिद्धान्तविरुद्ध भएको उल्लेख गरिएको छ।
आयोगले जारी गरेको औपचारिक पत्रमा बस्नेतलाई निर्वाचन आचारसंहिता उल्लंघन गरेको देखिएकाले किन निर्वाचन कानुनबमोजिम कारबाही नगर्ने भन्ने सम्बन्धमा स्पष्ट जवाफ पेश गर्न निर्देशन दिएको छ।
यसले उम्मेदवारको गतिविधिले मतदातामाथि अनुचित प्रभाव पार्न सक्ने भएकाले कडाइका साथ नियमन आवश्यक रहेको आयोगको तर्क रहेको छ।
आयोगले उक्त पत्र प्राप्त भएको मितिले तीन दिनभित्र स्वयं उपस्थित भएर वा प्रतिनिधिमार्फत जाजरकोटस्थित निर्वाचन कार्यालय वा केन्द्रीय निर्वाचन आयोगमा स्पष्टीकरण पेश गर्न आदेश दिएको छ।
समयसीमा भित्र स्पष्टीकरण नबुझाएमा आयोगले एकतर्फी निर्णय गर्दै कानुनी प्रक्रिया अगाडि बढाउन सक्ने चेतावनीसमेत दिएको छ।
निर्वाचन कानुनअनुसार आचारसंहिता उल्लंघन गर्ने उम्मेदवारलाई चेतावनी, जरिवाना, प्रचार गतिविधिमा प्रतिबन्ध, उम्मेदवारी रद्द वा कानुनी कारबाहीसम्मको व्यवस्था रहेको छ।
विशेषगरी नगद वितरण, भीडलाई प्रलोभन दिने कार्य र सार्वजनिक शान्ति भंग हुने गतिविधिलाई गम्भीर अपराधका रूपमा लिइन्छ।
