अमेरिकाको मेन राज्यस्थित बांगोर अन्तर्राष्ट्रिय विमानस्थलमा आइतबार साँझ निजी विमान दुर्घटना भएको छ। स्थानीय समयअनुसार साँझ करिब ७:४५ बजे (नेपाली समयअनुसार सोमबार बिहान) टेकअफ गर्ने क्रममा दुर्घटना भएको अमेरिकी टेलिभिजन नेटवर्क सिएनएनले जनाएको छ।
दुर्घटनाग्रस्त विमानमा ८ जना सवार रहेको पुष्टि गरिएको छ, तर उनीहरूको अवस्था र सम्भावित हताहतबारे तत्काल आधिकारिक विवरण सार्वजनिक गरिएको छैन।
अमेरिकाको संघीय उड्डयन प्राधिकरण (एफएए) का अनुसार दुर्घटनाग्रस्त विमान बम्बार्डियर च्यालेन्जर ६५० मोडलको व्यावसायिक निजी जेट हो।
एफएएले प्रारम्भिक जानकारी सार्वजनिक गर्दै विमान उडान तयारीकै क्रममा समस्यामा परेर धावनमार्ग नजिकै दुर्घटनाग्रस्त भएको जनाएको छ। बांगोर विमानस्थल प्रशासनले दुर्घटनापछि तत्काल आपतकालीन उद्धार टोली घटनास्थलमा परिचालन गरिएको जानकारी दिएको छ।
दुर्घटनाको कारण सुरक्षा जोखिम बढेकाले विमानस्थल अस्थायी रूपमा बन्द गरिएको छ। उडानहरू रोकिएका छन् भने यात्रुहरूलाई वैकल्पिक व्यवस्थापनतर्फ पठाइएको छ। एफएएले जारी गरेको विज्ञप्तिमा दुर्घटनाको औपचारिक छानबिन संघीय उड्डयन प्राधिकरण र राष्ट्रिय यातायात सुरक्षा बोर्ड (एनटीएसबी) ले संयुक्त रूपमा गर्ने जनाएको छ।
छानबिन टोलीले विमानको प्राविधिक अवस्था, मौसमको प्रभाव, पाइलटको निर्णय र एयर ट्राफिक कन्ट्रोलसँगको समन्वयलगायत पक्षमा अनुसन्धान गर्ने बताइएको छ। यो दुर्घटना उत्तरपूर्वी अमेरिकामा फैलिएको भीषण हिम आँधीका बीच भएको हो।
मेन राज्यमा तापक्रम शून्यभन्दा निकै तल झरेको छ भने हल्का हिमपात, चिसो हावा र बाक्लो कुहिरोका कारण भिजिबिलिटी अत्यन्तै कमजोर रहेको जनाइएको छ। मौसम विज्ञहरूका अनुसार उडान सुरक्षामा प्रतिकूल प्रभाव पार्ने अवस्था बनेको थियो।
संघीय अभिलेखअनुसार दुर्घटनाग्रस्त निजी जेट टेक्सासको ह्युस्टनमा दर्ता भएको एक सीमित दायित्व कम्पनी (एलएलसी) को नाममा रहेको पुष्टि गरिएको छ।
विमानको स्वामित्व, उडानको उद्देश्य र यात्रुको परिचयबारे विस्तृत विवरण सार्वजनिक हुन बाँकी रहेको छ। सिएनएनका अनुसार हालसम्म दुर्घटनाको ठोस कारणबारे कुनै आधिकारिक निष्कर्ष सार्वजनिक गरिएको छैन। अधिकारीहरूले प्रारम्भिक अनुसन्धानपछि विस्तृत प्रतिवेदन सार्वजनिक गर्ने बताएका छन्।
