निर्वाचन आयोगले निर्वाचन आचारसंहिता उल्लंघन गरेको आरोपमा पाँच जना उम्मेदवारसँग औपचारिक स्पष्टीकरण सोधेको छ। आयोगका अनुसार विभिन्न उजुरी र अनुगमनका आधारमा आचारसंहिता विपरीत गतिविधि गरेको पाइएपछि सम्बन्धित उम्मेदवारहरूसँग लिखित स्पष्टीकरण माग गरिएको हो।
स्पष्टीकरण सोधिएका उम्मेदवारहरूमा झापा–५ का बालेन्द्र शाह (बालेन), भक्तपुर–२ का महेश बस्नेत, सुनसरी–१ का हर्क साम्पाङ, रूपन्देही–२ का निकोलस भुसाल तथा भक्तपुर–२ की उम्मेदवार जानुका पाठक रहेका छन्।
आयोगका अनुसार झापा–५ का उम्मेदवार बालेन्द्र शाह (बालेन) ले सोही क्षेत्रका उम्मेदवार केपी शर्मा ओलीप्रति सामाजिक सञ्जालमार्फत अमर्यादित टिप्पणी गरेको उजुरी परेपछि स्पष्टीकरण सोधिएको हो। आयोगले चुनावी आचारसंहिता अनुसार प्रतिस्पर्धी उम्मेदवारको व्यक्तिगत चरित्रमाथि आक्रमण गर्न नपाइने व्यवस्था रहेको स्मरण गराएको छ।
भक्तपुर–२ का उम्मेदवार महेश बस्नेतलाई बालेनलाई ‘छाउरा’ भनेर अपमानजनक अभिव्यक्ति दिएको आरोपमा स्पष्टीकरण सोधिएको छ। सुनसरी–१ का उम्मेदवार हर्क साम्पाङमाथि भने चुनाव प्रचारका क्रममा बालबालिकालाई प्रयोग गरेको तथा प्रचार सामग्रीसहित टिसर्ट लगाउन लगाएको विषयमा आचारसंहिता उल्लंघन गरेको आरोप लागेको छ।
त्यस्तै रूपन्देही–२ का उम्मेदवार निकोलस भुसालमाथि ‘जेनजी आन्दोलन’सँग सम्बन्धित आइकोनिक जुत्तालाई आफ्नो चुनाव चिह्नका रूपमा प्रचार गरेको भन्दै आयोगले स्पष्टीकरण माग गरेको हो।
भक्तपुर–२ की उम्मेदवार जानुका पाठकमाथि पनि आयोगले स्पष्टीकरण सोधेको छ। उनीमाथि अन्य उम्मेदवारलाई लक्षित गर्दै ‘हत्यारा’ र ‘बलात्कारी’ जस्ता शब्द प्रयोग गरी घृणाजन्य टिप्पणी गरेको आरोप लगाइएको छ। आयोगले यस्ता अभिव्यक्तिले चुनावी वातावरण बिगार्ने भन्दै गम्भीरतापूर्वक लिएको जनाएको छ।
निर्वाचन आयोगले चुनावी प्रतिस्पर्धालाई मर्यादित, निष्पक्ष र सभ्य बनाउन आचारसंहिता उल्लंघनका घटनामा कडाइ गर्ने संकेत दिएको छ। आयोगका अनुसार स्पष्टीकरण चित्तबुझ्दो नभए कानुनअनुसार कारबाही प्रक्रिया अघि बढाइनेछ
