राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह, जसलाई सामान्यतया बालेनका नामले चिनिन्छ, हाल सुदूरपश्चिम प्रदेशको कैलाली जिल्लामा आफ्नो चुनावी अभियानमा व्यस्त छन्। उनले कैलालीका पाँचवटै निर्वाचन क्षेत्रलाई समेट्दै आफ्नो पार्टीका उम्मेदवारहरूको सम्पर्क कार्यालयहरू अवलोकन गरेका छन् र स्थानीय समर्थकहरूसँग प्रत्यक्ष भेटघाट पनि गरेका छन्।
बालेनले कैलाली–१ मा कोलम ज्ञवाली, कैलाली–२ मा केपी खनाल, कैलाली–३ मा जगत प्रसाद जोशी, कैलाली–४ मा खेमराज कोइराला र कैलाली–५ मा आनन्द चन्दको कार्यालयमा पुगेर चुनावी तयारीको अवस्थाबारे जानकारी लिएका छन्। प्रत्येक कार्यालयमा समर्थकहरूको उल्लेख्य उपस्थितिले स्थानीय जनसमर्थन र उत्साहको स्पष्ट संकेत दिएको छ।
उनी उम्मेदवारहरूलाई घरदैलो भ्रमणमार्फत जनताको समस्या बुझ्न, क्षेत्रीय माग संकलन गर्न र आफ्नो पार्टीको परिवर्तनमूलक एजेन्डा प्रवर्धन गर्न जोड दिनु भएको छ। बालेनले स्थानिय कार्यकर्ताहरूलाई अभियानमा सक्रिय रूपमा सहभागी हुन प्रेरित गर्दै उनीहरूको ऊर्जा र प्रतिबद्धता उच्च राख्न विशेष ध्यान दिएका छन्।
काठमाडौंको मेयर पदबाट राजीनामा दिएर देशव्यापी चुनावी अभियानमा सक्रिय बनेका बालेनको उपस्थिति र मार्गदर्शनले कैलालीमा रास्वपाका उम्मेदवार र कार्यकर्ताहरूमा नयाँ उत्साह र जोश थपेको बताइएको छ। राजनीतिक विश्लेषकहरूले बालेनको प्रत्यक्ष संलग्नताले स्थानीय जनमतमा सकारात्मक प्रभाव पार्न सक्ने भन्दै यसलाई आगामी निर्वाचनको महत्वपूर्ण रणनीतिक कदमको रूपमा मूल्यांकन गरेका छन्।
