वाणिज्य, आपूर्ति तथा उपभोक्ता संरक्षण विभागले नियमित बजार अनुमगनको क्रममा तीन वटा फर्मलाई जरिवाना गरेको छ।
अनुमगनको क्रममा देखिएको अनियमितता अनुसार विभागले पोखरेल ट्रेडर्सलाई १५ हजार, सुलभ किराना एण्ड खाद्य सप्लायर्सलाई १० हजार र शितल खाद्यान्न स्टोर, ललितपुरलाई पाँच हजार रुपैयाँ जरिवाना गरेको जनाएको छ। यो कारबाही उपभोक्ता संरक्षण ऐन, २०७५ को ‘फा’ १५ बमोजिम गरिएको हो।
त्यसैगरी, चिया कटेरो प्रालिलाई व्यवसायसँग सम्बन्धित कागजात लिएर तीन दिनभित्र विभागमा उपस्थित हुन निर्देशन दिइएको छ। अन्य १० वटा फर्मलाई सुधारात्मक निर्देशन जारी गरिएको विभागले जानकारी दिएको छ।
विभागले स्थानीय प्रशासन र उपभोक्ता अधिकारकर्मीको उपस्थितिमा बजारलाई व्यवस्थित बनाउँदै कानुनको सही कार्यान्वयन सुनिश्चित गर्न नियमित अनुमगन र निरीक्षण गर्दै आएको बताइएको छ।
