झापा जिल्ला प्रशासन कार्यालयले सामाजिक सञ्जालमार्फत मतदाताको गोपनीयता भङ्ग नगर्न आग्रह गरेको छ। फेसबुक, युट्युब लगायतका प्लेटफर्ममा मतदातासँग ‘कुन पार्टी वा चुनाव चिह्नमा मतदान गर्नुहुन्छ’ भन्ने प्रश्न सोध्ने गतिविधि बढ्दै गएको भन्दै प्रशासनले ध्यानाकर्षण गराएको हो।
सहायक प्रमुख जिल्ला अधिकारी तथा निर्वाचन आचारसंहिता अनुगमन अधिकृत तेजप्रसाद प्रसाईं र अञ्जन न्यौपानेद्वारा आइतबार जारी विज्ञप्तिमा यस्तो कार्य निर्वाचन आचारसंहिता २०८२ को दफा ४(द) विपरीत हुने स्पष्ट पारिएको छ।
केही अनलाइन सञ्चारमाध्यम तथा व्यक्तिहरूले सर्वसाधारणसँग प्रत्यक्ष रूपमा मतदानसम्बन्धी प्रश्न गरी मतदाताको गोपनीयता भङ्ग गरिरहेको सूचना प्राप्त भएपछि सार्वजनिक आग्रह गरिएको प्रशासनले जनाएको छ।
प्रशासनले आचारसंहिता उल्लङ्घन गर्ने वा गराउने जो–कोहीलाई प्रचलित कानुनअनुसार कारबाही गरिने चेतावनी पनि दिएको छ।
