फागुन २१ गते हुने प्रतिनिधि सभा निर्वाचनका लागि राष्ट्रिय प्रजातन्त्र पार्टी (राप्रपा) ले शनिबार आफ्नो चुनावी घोषणापत्र सार्वजनिक गरेको छ। पार्टीको केन्द्रीय कार्यालयमा आयोजित कार्यक्रममा अध्यक्ष राजेन्द्र लिङ्देनले ‘संकल्प पत्र’ सार्वजनिक गर्दै दीर्घकालीन राष्ट्रिय दृष्टिकोण प्रस्तुत गरेका हुन्।
राप्रपाले सबल, समृद्ध र समुन्नत नेपाल निर्माणलाई आफ्नो दीर्घकालीन सोचका रूपमा अघि सारेको छ। घोषणापत्रमा पुँजी निर्माण, दिगो विकास, शिक्षा र स्वास्थ्यमा निःशुल्क पहुँच, सामाजिक सुरक्षा, सामाजिक न्याय, समतामूलक समृद्धि तथा युवाकेन्द्रित उत्पादनमुखी अर्थतन्त्रमार्फत व्यापक रोजगारी सिर्जना गर्ने प्रतिबद्धता व्यक्त गरिएको छ।
दीर्घकालीन मार्गचित्रअनुसार २०८७ सालसम्म नेपाललाई मध्यम आयस्तरको मुलुक बनाउने लक्ष्य लिइएको छ। त्यसका लागि दिगो आर्थिक वृद्धि, गुणस्तरीय शिक्षा–स्वास्थ्य, गरीबी न्यूनीकरण, प्रविधिको विकास र विस्तार, रणनीतिक पूर्वाधार निर्माण, दिगो सहर तथा बस्ती विकास, उत्पादकत्व अभिवृद्धि, प्रभावकारी सार्वजनिक सेवा प्रवाह, प्राकृतिक स्रोतको सदुपयोग र दिगो सामाजिक सुरक्षा सुनिश्चित गर्ने रणनीति अवलम्बन गरिने उल्लेख छ।
घोषणापत्रमा राष्ट्रिय स्वतन्त्रता, अखण्डता, एकता र सार्वभौमिकताको संरक्षणलाई प्राथमिकता दिँदै प्राकृतिक, धार्मिक तथा सांस्कृतिक सम्पदाको संरक्षण र संवर्द्धनका लागि राष्ट्रिय सुरक्षा मूलनीति बनाउने संकल्प गरिएको छ।
राप्रपाले वैदिक सनातन धर्म सापेक्ष हिन्दु राष्ट्र स्थापना गर्ने लक्ष्य अघि सारेको छ भने सबै धर्मबीच समानता र धार्मिक स्वतन्त्रताको सुनिश्चितता गरिने प्रतिबद्धता जनाएको छ। जातीय भेदभाव, छुवाछुत तथा धर्मका आधारमा हुने कुनै पनि प्रकारको भेदभावलाई दण्डनीय बनाइने उल्लेख गरिएको छ। साथै प्रत्येक नागरिकलाई आफ्ना धर्म, संस्कृति, परम्परा र रीतिरिवाजअनुसार पूजा–आराधना गर्न पाउने अधिकारको संरक्षण गरिने भनिएको छ।
शासकीय स्वरूप सम्बन्धी प्रस्तावमा राप्रपाले अभिभावकीय संस्थाका रूपमा राजसंस्थाको व्यवस्था, खर्चिलो तथा अस्थिर निर्वाचन प्रणालीमा व्यापक सुधार, प्रदेश संरचनाको खारेजीसहित केन्द्र र बलियो स्थानीय तह भएको दुई तहको शासन व्यवस्था, सर्वधर्म समभावसहितको हिन्दु राष्ट्र र गैरदलीय स्थानीय तहको अवधारणा अघि सारेको छ।
