काठमाडाैं। अभिनेता राजेश हमाल अभिनित चलचित्र ‘प्रवासी जीवन’ सुपर फ्लप हुने देखिएको छ। फागुन १५ गतेदेखि प्रदर्शनमा आएको यो चलचित्रको कमाइ निकै कमजोर देखिएको छ। प्रदर्शनको ९ दिनसम्म यो चलचित्रले बक्स अफिसमा मात्र १ लाख ३८ हजार ४ सय ८० रूपैयाँ ग्रस कमाइ गरेको छ। भने यो चलचित्र धेरै हलबाट उत्रिसकेको छ।
गत शनिबार अर्थात फागुन २३ गतेसम्म यो चलचित्रको ५०९ वटा मात्र टिकट बिक्री भएको विकास बोर्डले सार्वजनिक गरेको विवरणमा उल्लेख छ।
चुनाव आउनु एक हप्ता अघि यो चलचित्र प्रदर्शनमा आएको थियो। चुनावको कारण अन्य निर्माताहरुले चलचित्र प्रदर्शन गर्न डराएको बेला ‘प्रवासी जीवन’ भने एकल प्रदर्शनमा आएको थियो। एकल प्रदर्शनको मौका पाए पनि चलचित्रले अपेक्षित व्यापार भने गर्न सकेन। राजेश हमालको यो चलचित्र हेर्न हलमा दर्शकको खडेरी देखियो।
चुनावी माहोलका कारण धेरैले हमालको चलचित्र हलमा लागेको पत्तोसमेत पाएनन्। अमेरिकामा बसोबास गर्दै आएका नेपालीहरुको संघर्ष र सफलताको कथामा निर्माण भएको ‘प्रवासी जीवन’लाई निर्माताहरुले पनि खासै अपेक्षा राखेको देखिँदैन ।
श्याम क्षेत्री र राम अधिकारीको निर्देशनमा बनेको यो चलचित्रमा राजेश हमाल, सरिता लामिछाने, बुद्धि तामाङ, महादेव त्रिपाठी, श्याम क्षेत्री, एन्जेला एक्स बस्नेत, गगन सुवेदीलगायतका कलाकारहरूको अभिनय छ। चलचित्रमा रबिन आचार्यको लगानी छ।
