पाल्पा, शनिबार साँझ — टिपर (लु २ ख ४५२५) दुर्घटना हुँदा तीन जनाको ज्यान गएको छ भने एक जना गम्भीर घाइते भएका छन्।
माथागढी गाउँपालिका-७ रहबास स्थित झडेवा–रहबास भित्री कच्ची सडकखण्डमा शनिबार साँझ उक्त दुर्घटना भएको हो। झडेवाबाट रहबास चुनढुंगा खानीतर्फ जाँदै गरेको टिपर सडकबाट करिब ५० मिटर तल खसेको प्रहरीले जनाएको छ।
दुर्घटनामा मृत्यु हुनेमध्ये चिन्ताबहादुर सुनार (२६), शीतगङ्गा नगरपालिका-४ सिद्धारा का रहेको सनाखत भएको छ भने अन्य दुई जनाको पहिचान खुल्न बाँकी रहेको जिल्ला प्रहरी कार्यालय पाल्पाले जनाएको छ।
दुर्घटनामा राजन चिदी (३३), तानसेन नगरपालिका-१० पटुवा गम्भीर घाइते भएका छन्। उनको लुम्बिनी मेडिकल कलेज प्रभास मा उपचार भइरहेको छ।
जिल्ला प्रहरी कार्यालय पाल्पाका सूचना अधिकारी होमप्रकाश चौधरी का अनुसार दुर्घटनामा गम्भीर घाइते भएकाहरूलाई अस्पताल पुर्याइए पनि चिकित्सकले तीन जनालाई मृत घोषणा गरेका थिए।
प्रहरीले दुर्घटनाको कारणबारे अनुसन्धान भइरहेको जनाएको छ।
