१६ चैत, जुम्ला — जुम्लामा जातीय विभेद गरेको आरोपमा एक जना महिलालाई प्रहरीले नियन्त्रणमा लिएको छ। गुठीचौर गाउँपालिका-३ की कविता बुढा लाई प्रहरीले आइतबार पक्राउ गरेको हो।
पक्राउ परेकी बुढामाथि जुम्लाकै राजबहादुर सुनार लाई जातीय आधारमा विभेद र अपमान गरेको आरोप छ। जुम्ला सदरमुकाम कालेखोलीस्थित एउटा होटलमा भएको उक्त घटनामा बुढाले सुनारमाथि अपशब्द प्रयोग गरी गालीगलौज गरेको बताइएको छ।
उक्त विभेदपूर्ण व्यवहारको भिडियो सामाजिक सञ्जालमा सार्वजनिक भएपछि प्रहरीको ध्यान आकर्षित भएको थियो। भिडियोमा देखिएको दृश्य र भाषाका आधारमा प्रहरीले तत्काल एक्सन लिएको हो।
जुम्लाका प्रहरी नायव उपरीक्षक (डीएसपी) रविनबाबु रेग्मीका अनुसार: “सामाजिक सञ्जालमा भिडियो बाहिरिएलगत्तै उनलाई नियन्त्रणमा लिएर अनुसन्धान अघि बढाइएको छ। यद्यपि, पीडित पक्षबाट हालसम्म औपचारिक जाहेरी भने आइसकेको छैन।”
प्रहरीले जाहेरी कुरिरहेको भए पनि जातीय भेदभाव तथा छुवाछूत (कसूर र सजाय) ऐन अनुसार घटनाको सूक्ष्म अनुसन्धान भइरहेको जनाएको छ। दोषी ठहरिएमा जातीय विभेद गर्ने व्यक्तिलाई कैद र जरिवाना दुवै हुने कानुनी प्रावधान रहेको छ।
