१७ चैत, काठमाडौँ — नेकपा (एमाले) को सचिवालय बैठक आज पार्टी कार्यालय च्यासलमा बसिरहेको छ। पार्टी अध्यक्ष केपी शर्मा ओली पक्राउ परेपछि विकसित राजनीतिक घटनाक्रमका बीच एमाले सचिवालयको यो दोस्रो बैठक हो।
‘जेनजी’ आन्दोलनमा दमन गरेको आरोपमा अध्यक्ष ओली पक्राउ परेकै दिन (गत शनिबार) उपाध्यक्ष रामबहादुर थापा ‘बादल’ को अध्यक्षतामा पहिलो सचिवालय बैठक बसेको थियो। सो बैठकले ओलीको पक्राउलाई राजनीतिक प्रतिशोध भन्दै विरोधका प्रारम्भिक कार्यक्रमहरू तय गरेको थियो। आजको बैठकमा ती आन्दोलनका कार्यक्रमहरूलाई थप प्रभावकारी बनाउने र देशव्यापी परिचालन गर्ने विषयमा छलफल भइरहेको छ।
बैठकको अर्को मुख्य एजेन्डा संसदीय दलको नेता चयन रहेको छ। निर्वाचनपछिको नयाँ राजनीतिक सन्दर्भमा एमालेले आफ्नो संसदीय मोर्चा सम्हाल्ने नेता छान्न लागेको हो। आगामी १९ चैत दिउँसो २ बजेका लागि प्रतिनिधिसभाको पहिलो बैठक बोलाइएको छ। संसद् बैठकअगावै दलको नेता चयन गरिसक्नुपर्ने कानुनी र राजनीतिक अभ्यासका कारण एमालेले आजै यसबारे ठोस निर्णय लिने सम्भावना छ।
गत २१ फागुनमा सम्पन्न निर्वाचनबाट निर्वाचित सांसदहरूको पहिलो बैठक बस्नुअघि एमालेले आफ्नो आन्तरिक शक्ति सन्तुलन र सरकारप्रतिको दृष्टिकोण प्रस्ट पार्ने तयारी गरेको छ। बैठकमा पार्टीका शीर्ष नेताहरूको उपस्थिति रहेको छ।
