काठमाण्डौँ- पहिलो कारोबार दिन नै धितोपत्र बजारमा ठूलो गिरावट आउँदा लगानीकर्ताहरू त्रसित बनेका छन् । आइतबार नेपाल स्टक एक्सचेन्ज (नेप्से) परिसूचक १०५.५० अंकले घटेर २६७६.६८ विन्दुमा ओर्लिएको छ भने ३४५ कम्पनीको १२ अर्ब ३८ करोड ९ लाख रुपैयाँभन्दा बढीको सेयर कारोबार भएको छ । बजार विश्लेषकहरूका अनुसार सरकारले ठूला व्यवसायीहरूमाथि सम्पत्ति शुद्धीकरणको मुद्दा चलाउने प्रक्रिया अघि बढाएपछि सिर्जना भएको मनोवैज्ञानिक त्रास र नियामकको कडाइका कारण ठूला लगानीकर्ताहरू पर्ख र हेरको अवस्थामा रहँदा बिक्री चाप बढेको हो ।
बजारमा आएको यो भारी गिरावटबीच २६१ कम्पनीको मूल्य ओरालो लाग्दा १३ वटै उपसमूहका सूचकहरू राताम्मे देखिएका छन् । यद्यपि, प्रतिकूल बजारमा पनि रिलायन्स स्पिनिङ मिल्स, भुजुङ्ग हाइड्रोपावर, रिलायन्स लाइफ इनर्जी लगायतका ६ वटा साना तथा नयाँ कम्पनीहरूको सेयर मूल्यमा १० प्रतिशतको सकारात्मक सर्किट लागेको छ भने ७ वटा कम्पनीको मूल्यमा नकारात्मक सर्किट लागेको छ । निरन्तर बढिरहेको बजारमा आएको प्राविधिक ‘करेक्सन’ र सरकारको पछिल्लो कदमले बजारलाई एकैपटक ठूलो धक्का दिएको जानकारहरूको बुझाइ छ ।
