कोशी प्रदेशको उदयपुर जिल्लामा भारत सरकारको आर्थिक सहयोगमा निर्माण गरिएको श्री बालमन्दिर माध्यमिक विद्यालयको नयाँ भवन आज औपचारिक रूपमा उद्घाटन गरिएको छ ।
त्रियुगा नगरपालिकामा निर्माण भएको उक्त विद्यालय भवनको उद्घाटन त्रियुगा नगरपालिकाका मेयर श्री बसन्त कुमार बस्नेत र काठमाडौंस्थित भारतीय राजदूतावासका द्वितीय सचिव श्री गरिमा नौटियालले संयुक्त रूपमा गरेका हुन् । यो भवन “उच्च प्रभाव सामुदायिक विकास परियोजना” अन्तर्गत निर्माण गरिएको हो, जसको कार्यान्वयन त्रियुगा नगरपालिका, उदयपुरमार्फत गरिएको थियो ।
विद्यालय भवन तथा अन्य संरचनाहरूको निर्माण उच्च प्रभाव सामुदायिक विकास परियोजनाको रूपमा अघि बढाइएको थियो । श्री बालमन्दिर माध्यमिक विद्यालयको स्थापना सन् १९५५ मा उदयपुर जिल्लामा भएको हो । यस विद्यालयले पूर्वप्राथमिकदेखि माध्यमिक तहसम्म शिक्षा प्रदान गर्दै आएको छ ।
उद्घाटन कार्यक्रममा नगरप्रमुख, विद्यालय व्यवस्थापन समिति तथा अन्य सरोकारवालाहरूले भारत सरकारले निरन्तर प्रदान गर्दै आएको विकास सहयोगको प्रशंसा गरे । उनीहरूले नयाँ भौतिक संरचनाले यस क्षेत्रको शैक्षिक पूर्वाधारलाई थप मजबुत बनाउने विश्वास व्यक्त गरे ।
छिमेकी मुलुकको हैसियतले नेपाल र भारतबीच बहुआयामिक र बहुक्षेत्रीय सहकार्य रहँदै आएको उल्लेख गर्दै उच्च प्रभाव सामुदायिक विकास परियोजनाको कार्यान्वयनले स्थानीय तहका प्राथमिकताका क्षेत्रमा पूर्वाधार विस्तार गर्न सहयोग पुगेको बताइयो । यसले नेपाल सरकारले अघि बढाएका विकास प्रयासहरूलाई थप सुदृढ बनाउने विश्वास व्यक्त गरिएको छ ।
