अमेरिकामा आइतबार आएको भीषण हिम आँधी (हिउँसहितको शक्तिशाली आँधी) ले देशभर जनजीवन ठप्प बनाएको छ। आँधीका कारण करिब १० लाखभन्दा बढी घर तथा व्यवसायमा विद्युत् सेवा अवरुद्ध भएको छ भने सडक, हवाई यातायात र आपूर्ति प्रणाली गम्भीर रूपमा प्रभावित भएका छन्।
स्थिति नियन्त्रणबाहिर जान थालेपछि अमेरिकी राष्ट्रपति डोनाल्ड ट्रम्पले राजधानी वासिङ्टन डिसीसहित २० वटा राज्यमा आपत्काल घोषणा गरेका छन्।
नेशनल वेदर सर्भिस (एनडब्ल्यूएस) का अनुसार यो हिम आँधी करिब ३,२२० किलोमिटर क्षेत्रफलमा फैलिएको छ। आँधीको प्रत्यक्ष असर करिब २१ करोड अमेरिकी नागरिकमा परेको छ, जुन देशको कुल जनसंख्याको झन्डै दुई-तिहाइ हिस्सा हो।
विशेषज्ञहरूका अनुसार यस किसिमको व्यापक आँधी दशकौँयताकै दुर्लभ र शक्तिशाली मौसमीय घटना मानिएको छ।
ब्रिटिस सञ्चारमाध्यम ‘डेली मेल’ का अनुसार न्युयोर्कसहित विभिन्न राज्यमा हालसम्म कम्तीमा १३ जनाको ज्यान गइसकेको छ। चिसो, सडक दुर्घटना, विद्युत् पोल र रुख ढल्दा भएको क्षति तथा स्वास्थ्य जटिलताका कारण मृतक संख्या बढ्न सक्ने अधिकारीहरूले चेतावनी दिएका छन्।
‘फ्लाइटअवेयर’ को तथ्याङ्कअनुसार शुक्रबारदेखि हालसम्म ३१,००० भन्दा बढी उडान प्रभावित भएका छन्। तीमध्ये १८,००० भन्दा बढी उडान पूर्ण रूपमा रद्द गरिएको छ।
आइतबार मात्रै १०,८०० भन्दा बढी उडान रद्द भएका थिए। मौसम विज्ञहरूका अनुसार खराब मौसमको प्रभाव अझै केही दिनसम्म कायम रहने भएकाले हवाई सेवा सामान्य अवस्थामा फर्किन समय लाग्ने अनुमान गरिएको छ।
विद्युत् सेवा अवरुद्ध हुने राज्यहरूमध्ये टेनेसी सबैभन्दा बढी प्रभावित बनेको छ। आइतबार दिउँसोसम्म करिब ३ लाख ३७ हजार घर तथा व्यवसायमा बिजुली सेवा बन्द थियो।
त्यसैगरी लुइसियाना, मिसिसिपी, केन्टकी, जोर्जिया, अलाबामा र वेस्ट भर्जिनियामा पनि लाखौँ नागरिक अन्धकारमा बस्न बाध्य भएका छन्।
हिउँ, असिना र तीव्र हावाहुरीका कारण रुख ढल्नु, ट्रान्समिसन टावर र तार चुँडिनु विद्युत् अवरोधको प्रमुख कारण बनेको छ।
ऊर्जा क्षेत्रका अधिकारीहरूले प्रभावित क्षेत्रमा विद्युत् आपूर्ति पूर्ण रूपमा पुनःस्थापना गर्न अझै केही हप्ता लाग्न सक्ने बताएका छन्। पूर्वाधारमा भएको क्षति गम्भीर भएकाले मर्मत कार्य जटिल र समयसापेक्ष हुने अनुमान गरिएको छ ।
क्यानडाको सीमासँग जोडिएका उत्तरी क्षेत्रहरूमा तापक्रम -३७ देखि -४५ डिग्री सेल्सियससम्म झरेको छ। न्यूयोर्क राज्यकी गभर्नर क्याथी होचुलले यसलाई ‘हड्डी नै जमाउने आर्कटिक आँधी’ भन्दै नागरिकलाई अत्यधिक सतर्कता अपनाउन आग्रह गरेकी छन्।
उनले यो वर्षौँयताकै सबैभन्दा लामो र कठोर चिसो लहर भएको बताउँदै आपत्कालीन तयारीमा रहन निर्देशन दिएकी छन्।
आपत्काल घोषणा भएसँगै फेडरल इमर्जेन्सी म्यानेजमेन्ट एजेन्सी (FEMA) ले विभिन्न राज्यहरूमा खोज तथा उद्धार टोली, राहत सामग्री र अतिरिक्त जनशक्ति परिचालन गरेको छ।
प्रशासनले अत्यावश्यक सेवाहरू सञ्चालनमा राख्न, अस्पताल, वृद्धाश्रम र आपत्कालीन केन्द्रलाई प्राथमिकतामा राखेर सहयोग पुर्याइरहेको जनाएको छ।
मौसमविद्हरूले आगामी केही दिनसम्म अत्यधिक चिसो, हिमपात र तेज हावाहुरी जारी रहने सम्भावना रहेको बताएका छन्। यसले थप विद्युत् अवरोध, यातायात समस्या र जनस्वास्थ्य जोखिम निम्त्याउन सक्ने चेतावनी दिइएको छ।
