पूर्वराष्ट्रपति विद्यादेवी भण्डारीले लोकतन्त्रलाई जनउत्तरदायी, पारदर्शी र प्रभावकारी बनाउँदै समृद्ध नेपालको आकाङ्क्षा साकार पार्नु नै शहीदप्रतिको सच्चा सम्मान हुने बताएकी छन्।
शहीद दिवस ०८२ का अवसरमा आज जारी सन्देशमा पूर्वराष्ट्रपति भण्डारीले नागरिक स्वतन्त्रता, लोकतन्त्र र राष्ट्रिय स्वाधीनताको संरक्षणका लागि अमूल्य जीवन बलिदान गर्ने सम्पूर्ण शहीदप्रति श्रद्धाञ्जली अर्पण गरेकी हुन्।
उनले शुक्रराज शास्त्री, धर्मभक्त माथेमा, दशरथ चन्द, गङ्गालाल श्रेष्ठलगायत ज्ञात–अज्ञात शहीदको त्यागबाट प्राप्त लोकतन्त्रलाई केवल संरचनागत उपलब्धिमा सीमित राख्न नहुने उल्लेख गरिन्।
सामाजिक सञ्जालमार्फत सार्वजनिक सन्देशमा भण्डारीले सुशासन, सामाजिक न्याय र आर्थिक समृद्धिसँग लोकतन्त्रलाई जोड्दै अघि बढ्नु सबैको साझा दायित्व भएको बताउँदै, शहीद दिवसले सबैलाई इमान्दारीपूर्वक आफ्नो भूमिका निर्वाह गर्न थप प्रेरणा प्रदान गरोस् भन्ने कामना व्यक्त गरेकी छन्।
यसैबीच, आज देशभर विभिन्न कार्यक्रम गरी शहीद दिवस मनाइँदैछ।
