नेपाली कांग्रेसका सभापति गगन थापाले अहिलेको कांग्रेससँग विगतका राम्रा सबै कुरा रहे पनि नराम्रा कुरा केही पनि बाँकी नरहेको दाबी गरेका छन्।
शुक्रबार सर्लाही–४ मा आयोजित चुनावी कार्यक्रममा बोल्दै सभापति थापाले मतदातालाई आश्वस्त पार्दै अहिलेको कांग्रेसले अघिल्ला कमजोरीबाट सिकेर अघि बढेको बताए।
उनले हिजोको कांग्रेसका सबै कुरा खराब नभएको स्पष्ट गर्दै भने, ‘हामीलाई हाम्रो राम्रा कुराको इतिहाससँग गौरव छ। त्यो हाम्रो परम्परा र संस्कृति हो।’ तर, हिजोका खराब अभ्यास भने अहिलेको कांग्रेसले त्यागिसकेको दाबी गरे।
सभापति थापाले नयाँ समयका नयाँ मागलाई सम्बोधन गर्दै कांग्रेस अघि बढेको उल्लेख गर्दै अहिलेको कांग्रेससँग स्पष्ट सोच र पाँच वर्षे योजना रहेको बताए।
उनका अनुसार भ्रष्टाचार र कुशासन अन्त्य गर्दै लामो समयदेखि गर्न नसकिएका कामहरू अब पूरा गर्ने प्रतिबद्धतासहित कांग्रेस चुनावी मैदानमा उत्रिएको छ।
