नवलपरासी (बर्दघाट–सुस्तापूर्व)को गैँडाकोटस्थित नारायणी नदीमा नेपालकै पहिलो क्रुज ‘राइनो क्रुज’ नियमित रूपमा सञ्चालनमा आएको छ। जल पर्यटन प्रवर्द्धन तथा धार्मिक र पर्यटकीय गन्तव्यहरू जोड्ने उद्देश्यले सुरु गरिएको यो क्रुजले देवघाटदेखि दक्षिणतर्फ ४० किलोमिटरसम्म यात्रा गर्ने अनुमति पाएको छ। साढे दुई तले, ९५ फिट लम्बाइ र २१ फिट चौडाइ भएको क्रुजमा एकपटकमा १५० जनालाई सेवा दिने व्यवस्था गरिएको छ।
क्रुजमार्फत ब्रेकफास्ट, लन्च, डिनर क्रुजिङसहित विवाह, उत्सव तथा विशेष कार्यक्रम प्याकेज सञ्चालन गरिनेछ। साधारण टिकट ५ सय रुपैयाँ तोकिएको छ भने प्याकेजअनुसार शुल्क फरक–फरक रहनेछ। प्रति यात्रु १० लाख रुपैयाँ बराबरको बिमा गरिएको क्रुजले नारायणी नदीलाई दक्षिण एसियाकै नमूना जल पर्यटन गन्तव्य बनाउने लक्ष्य राखेको छ।
५० करोड रुपैयाँ लगानीमा सुरु गरिएको यस परियोजनाले स्थानीय रोजगारी, आन्तरिक पर्यटन र क्षेत्रीय आर्थिक गतिविधि विस्तारमा टेवा पुर्याउने अपेक्षा गरिएको छ। साथै देवघाटधाम, मौलाकालिका, वाल्मीकि आश्रम, सौराहा र लुम्बिनीजस्ता प्रमुख धार्मिक तथा पर्यटकीय क्षेत्रलाई एउटै पर्यटन करिडोरमा जोड्ने लक्ष्य पनि राखिएको छ।
