मुस्ताङमा आगामी फागुन २१ मा हुने प्रतिनिधि सभा निर्वाचनको तयारी चलिरहेको छ, तर जिल्लाका अधिकांश मतदाता जिल्ला बाहिर रहेका कारण प्रचारप्रसारमा गति कम देखिएको छ। मतदाताको परम्परागत बेसी झर्ने संस्कृतिका कारण यहाँको निर्वाचन गतिहीन रहेको बताइएको छ।
जिल्लाका माथिल्लो र तल्लो क्षेत्रका मतदाताको करिब ५०–८० प्रतिशत हिस्सा अहिले पोखरा, काठमाडौँ र अन्य ठाउँमा बेसीमा छन्। यसै कारण राजनीतिक दलका उम्मेदवारहरूले जिल्लामा मतदाता भेट्ने काम सुस्त भएको बताएका छन्। उम्मेदवारहरू फोन सम्पर्क र बेसीमै बसेर मतदाता भेट्ने प्रयासमा रहेको जानकारी प्राप्त भएको छ।
जिल्लामा आठ राजनीतिक दलका उम्मेदवारले चुनावी तयारी सुरु गरेका छन्। नेपाली कांग्रेस, एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी लगायतका दलले उम्मेदवारी दर्ता गरिसकेका छन्।
जिल्ला निर्वाचन अधिकृत लोकेन्द्र ज्ञवालीका अनुसार सुरक्षा निकायले निर्वाचन सुरक्षाका लागि तयारी पूरा गरिसकेको छ भने मतदान केन्द्र र मतदानस्थलको अनुगमन भइरहेको छ।
मुस्ताङमा कुल ११,३२८ मतदाता रहेका छन् र मतदानका लागि ३९ मतदान केन्द्र स्थापना गरिएको छ। राजनीतिक दल र उम्मेदवारले बाहिर रहेका मतदातालाई निर्वाचन मितिमा फर्काएर मतदानमा सहभागी गराउने चुनौती सामना गर्नुपर्ने अवस्था छ।
