रुसको राजधानी मस्कोमा रुसी सेनाका जनरलमाथि गोली प्रहार भएको छ। लेफ्टिनेन्ट जनरल भ्लादिमिर अलेक्सेयेभलाई गोली हानी घाइते बनाइएको हो।
शुक्रबार बिहान मस्कोको उत्तरपश्चिमी बाहिरी क्षेत्रमा रहेको भोलोकोलाम्स्कोय राजमार्ग नजिकैको एक आवासीय भवनमा उनीमाथि आक्रमण भएको बीबीसीमा समाचार छ। आक्रमणपछि गम्भीर घाइते अलेक्सेयेभलाई तत्काल अस्पतालमा भर्ना गरिएको भए पनि उनको स्वास्थ्य अवस्थाबारे हालसम्म विस्तृत जानकारी सार्वजनिक गरिएको छैन।
लेफ्टिनेन्ट जनरल अलेक्सेयेभ रुसको सेनाको मुख्य निर्देशनालय (जनरल स्टाफ) अन्तर्गतको गुप्तचर निकाय जीआरयू (GRU) का वरिष्ठ अधिकारी हुन्। युक्रेनमाथि रुसले आक्रमण सुरु गरेको झन्डै चार वर्षपछि मस्कोमा शीर्ष सैन्य अधिकारीहरूलाई लक्षित गर्दै यस्ता आक्रमणहरू बढ्दै गएका छन्।
अलेक्सेयेभले युक्रेनी युद्धका क्रममा महत्वपूर्ण भूमिका खेलेका थिए। सन् २०२२ मा मारिउपोलको घेराबन्दीका बेला युक्रेनसँग भएको वार्तामा उनी सहभागी थिए। साथै, सन् २०२३ को जुनमा राष्ट्रपति भ्लादिमिर पुटिनविरुद्ध विद्रोहको नेतृत्व गरेका वाग्नर भाडा समूहका प्रमुख येभगेनी प्रिगोजिनसँग वार्ता गर्न पनि उनलाई पठाइएको थियो।
सन् २०१८ मा बेलायतको सालिसबरीमा भएको नर्भ एजेन्ट आक्रमणमा जीआरयूको संलग्नता रहेको आरोपपछि अलेक्सेयेभमाथि युरोपेली सङ्घ (EU) ले प्रतिबन्ध लगाएको थियो।
आक्रमणमा संलग्न व्यक्तिहरूको पहिचान अहिलेसम्म खुलेको छैन। युक्रेनले यसअघि रुसी सैन्य अधिकारीहरूमाथि भएका केही आक्रमणहरूको जिम्मेवारी लिँदै आएको छ। रुसी अधिकारीहरूले भने गत महिनाको अन्त्यतिर सेन्ट पिटर्सबर्गमा एक सैनिकमाथि हुन लागेको आक्रमण विफल पारेको दाबी गरेका छन्।
यसअघि सन् २०२४ मा पनि अर्का रुसी जनरल इगोर किरिलोभको मस्कोमै हत्या गरिएको थियो। उक्त आक्रमण युक्रेनको गुप्तचर निकाय एसबीयूको योजनामा भएको दाबी गर्दै एक उज्बेक नागरिकलाई जेल सजाय सुनाइएको थियो।
