काठमाडौँ — सम्पत्ति शुद्धीकरणको मुद्दामा अनुसन्धानका लागि प्रहरी नियन्त्रणमा रहेका पूर्वऊर्जामन्त्री दीपक खड्का अस्पताल भर्ना भएका छन्। आइतबार बिहान पक्राउ परेका खड्कालाई स्वास्थ्यमा समस्या देखिएपछि महाराजगन्जस्थित त्रिवि शिक्षण अस्पताल (टिचिङ) भर्ना गरिएको हो।
काठमाडौँ जिल्ला प्रहरी परिसरका एसपी पवनकुमार भट्टराईका अनुसार खड्काको स्वास्थ्य अवस्थालाई ध्यानमा राख्दै उनलाई अस्पताल लगिएको हो।
केन्द्रीय अनुसन्धान ब्युरो (सीआईबी) ले आइतबार बिहान खड्कालाई नियन्त्रणमा लिएको थियो। लगत्तै काठमाडौँ जिल्ला अदालतले उनलाई अनुसन्धानका निम्ति ७ दिन हिरासतमा राख्न अनुमति दिएको छ।
अदालतको आदेशमा भनिएको छ: “प्रतिवादी दीपक खड्काको बयान कार्य सुरु भए पनि उनीविरुद्ध प्रमाण बुझ्ने तथा अनुसन्धानसम्बन्धी कार्य बाँकी रहेकाले, सम्पत्ति शुद्धीकरण अनुसन्धान विभागको मागबमोजिम ७ दिनको म्याद थपको अनुमति प्रदान गरिएको छ।”
खड्काविरुद्धको यो अनुसन्धान गत भदौ २४ गते उनको घरमा फेला परेका जलेका नोटहरूसँग सम्बन्धित छ। सो घटना बाहिरिएपछि सम्पत्ति शुद्धीकरण विभाग र सीआईबीले उनीमाथि सूक्ष्म निगरानी र अनुसन्धान अगाडि बढाएका थिए।
प्रहरीले हाल उनको बयान लिने कार्यलाई निरन्तरता दिँदै थप प्रमाणहरू संकलन गरिरहेको छ।
