सिरहा । राजनीतिमा आलोचना र आरोप नयाँ चिज होइन । तर, राजनीति गरेर नेतृत्वमा पुगेकाहरूले ठीकसित काम गर्ने हो भने ती आलोचना, आरोप र विरोधको खण्डन गरिरहन पर्दैन ।
मिर्चैया नगरपालिकाका मेयर श्रवणकुमार यादवको यो दोस्रो कार्यकाल हो । जनयुद्ध पृष्ठभूमिबाट आएका उनले गरिरहेका काम यति जनप्रिय छन् कि कसैलाई पनि कुनै किसिमको जवाफ फर्काउनुपरेको छैन ।
मिर्चैयामा बुधबार आयोजित सार्वजनिक सुनुवाइ कार्यक्रममा उनले भए-गरेका कामको फेरिहस्त सुनाए । जसमा यस्ता-यस्ता कामहरू समावेश छन्, जसले निकट भविष्यमा हरेक सूचकांकमा मिर्चैयालाई गर्विलो स्थानमा उभ्याउने छन् ।
यी हुन् मिर्चैयाको मुहार फेर्ने काम :
मिर्चैयाका ग्रामीण बस्तीहरू कुनै बेला बर्खामा हिलो र घाम लाग्दा धुलोले आक्रान्त हुन्थ्यो । तर, अहिले सबैजसो ग्रामीण बस्तीहरूमा सडक सञ्जाल विस्तार भएको छ । अझै हुने क्रममा रहेको नगर प्रमुख यादवको भनाइ छ ।
शिक्षामा सुधारका निम्ति पनि मिर्चैया नगरपालिकाले गरेको प्रयास सराहनीय छ । शिक्षकहरूलाई जिम्मेवार बनाउन इहाजिरी लागू गरेको यो पालिकाले अनुपस्थित हुने विद्यार्थीको घरमै फोन गरेर जानकारी लिने व्यवस्थासमेत मिलाएको छ ।
नगरपालिकाको १२ वटै वडामा रहेका विद्यालयहरूमा आवश्यकता अनुसार भौतिक संरचना विस्तार गर्ने कामहरू निरन्तर छन् । यतिमात्र होइन, सामुदायिक विद्यालयहरूमा आर्थिक स्रोत नै छुट्याएर नगरपालिकाले कोचिङ सञ्चालन गर्दै आएको छ ।
मेयर यादव बेला-बेला आफैं विद्यालयहरूको अनुगमनमा निस्कने गर्छन् । जसका कारण अहिले निजी विद्यालयका विद्यार्थीहरू पनि सामुदायिक विद्यालयमा भर्ना हुने क्रम बढेको छ ।
स्वास्थ्य क्षेत्रमा भएका कामले मिर्चैयाका मात्र होइन, जिल्लाकै विभिन्न स्थान र अन्य जिल्लाका मान्छेहरू पनि लाभान्वित भइरहेका छन् । कुनै समय थियो – जतिबेला मिर्चैयामा किराना पसल जस्तो निजी क्लिनिकहरू हुन्थ्यो ।
जसमा नागरिकको स्वास्थ्यसँग खेलवाड हुन्थ्यो नै, ठगी धन्दा पनि चल्दै आएको थियो । तर, मिर्चैया अस्पताललाई नगरपालिकाले यसरी सुधार र विस्तार गर्यो कि पछिल्ला वर्षमा ती निजी अस्पतालहरू सुकेका छन् भने मिर्चैया अस्पतालमा सेवाहरूको चाप थेगिनसक्नु हुन्छ ।
नगरपालिकाले वडास्तरमै पनि प्रभावकारी स्वास्थ्य सेवा प्रवाह गरिरहेको छ । जसका कारण सर्वसाधारणलाई सामान्य उपचारका लागि पनि सहर आउनुपर्ने बाध्यता हटेको छ ।
किसानलाई आत्मनिर्भर बनाउन नगरपालिकाले गरेको कामको फेरिहस्त पनि लामै छ । नगरपालिकाले नगरका विभिन्न स्थानमा कृषि सडक विस्तार गरेको छ । सिंचाइका लागि बोर्डिङ र विद्युतको व्यवस्था मिलाएको छ ।
आगामी आर्थिक वर्षदेखि त नगरपालिकाले किसानको सिचाइको विद्युत महसुस तिरिदिने योजना पनि अघि बढाएको छ । यसबाट यहाँका किसानहरूलाई ठूलो राहत मिल्नेछ ।
खानेपानी योजना, कृषिमा क्रान्ति, सडक सुधार, फोहोर व्यवस्थापन, विद्यालय स्तरोन्नति र स्वास्थ्य सेवामा सुधारजस्ता दर्जनौं योजनाले मिर्चैयाको अनुहार फेरिएको छ ।
नगरपालिकामा भएका विकासका कामले नागरिक खुशी रहेको र आफ्ना लागि यही नै सन्तुष्टि भएको उनी बताउँछन् । केही अराजनीतिक र आपराधिक चरित्रका व्यक्ति विरोधका लागि विरोध गर्ने तर यसले आफूलाई फरक नपर्ने मेयर यादवको भनाइ छ ।
